Պերմյակովը մտավոր թերզարգացած է. Газета.Ru-ի նոր վարկածը

Արդեն հայտնել ենք, որ ռուսական LifeNews -ին հայտնի է դարձել, թե Գյումրիում դաժան սպանդի մեջ կասկածվող Վալերի Պերմյակովը Չիտայում ծառայության ժամանակ մեկ ամսից ավելի բուժվել է ռազմական հոսպիտալի հոգեբուժարանում: 

Газета.Ru-ն իր աղբյուրներից իմացել է, թե Պերմյակովը տառապում է օլիգոֆրենիայով (մտավոր թերզարգացածությամբ):

«Վալերի Պերմյակովը չէր կարող զորակոչվել բանակ, քանի որ նա տառապում է մտավոր թերզարգացածությամբ»,- գրում է պարբերականը:

Газета.Ru-ի աղբյուրների համաձայն՝ գլխավոր զինվորական դատախազությունը պահանջել է պատասխանատվության ենթարկել ինչպես զինկոմիսարիատի աշխատակիցներին, որոնք նրան զորակոչել են բանակ, այնպես էլ Հայաստանում ռուսական 102-րդ զորամասի հրամանատարներին, ովքեր նրան զենք են վստահել:

Նշենք նաև, որ ռազմական փորձագետ Իգոր Կորոտչենկոն պարբերականի հետ զրույցում վստահություն  է հայտնել, որ հոգեկան հիվանդներին ռուսական բանակ զորակոչելու հավանականությունը հավասար է զրոյի:

Ուշագրավ է, որ դաժան սպանությունից  գրեթե մեկ ամիս անց միայն  ռուսական ԶԼՄ-ները որոշել են դիմել իրենց աղբյուրներին և ակտիվորեն տեղեկություն տարածել Պերմյակովի՝ հոգեկան հիվանդ լինելու մասին: