Ալիևի մտավոր ներուժի մասին բոլորը գիտեն

Ալիևի մասին WikiLeaks-ի բացահայտումները թերևս նորություն էին միայն լայն հասարակության համար: Իսկ հանրապետությունների նախագահների եւ բարձրաստիճան այլ պաշտոնյաների համար նման բացահայտումները պետք է, որ վաղուց արդեն արված լինեին:

«Կարծում եմ, որ Ալիևի պայծառամտության եւ մտքի փայլատակումների վրա պետք չէ զարմանալ: Բարձրաստիճան գործիչները նրա հետ շփումների ժամանակ հավանաբար հասկացել են, թե ինչպիսին է Ալիևի մտավոր ներուժը»,- այսօրվա ասուլիսի ժամանակ ասաց Քաղաքական հետազոտությունների ինստիտուտի ավագ փորձագետ, թուրքագետ Լեւոն Հովսեփյանը:

«Երկիր»-ի հարցին, թե լրատվամիջոցներով թնդում է Ալիևի կնոջ պլաստիկ վիրահատությունների թեման նույնպես եւ ի՞նչ լուրջ կարեւորություն կարող է ունենալ նման մանրուք թվացող ինֆորմացիան, Լ.Հովսեփյանը պատասխանեց.

«Ընդունված է, որ հետախուզական ծառայությունները այլ երկրների ղեկավարների անձնական հատկանիշների, հակումների, նախասիրությունների միջոցով կազմում են նրանց հոգաբանական բնութագիրը: Սա էլ թույլ է տալիս կողմնորոշվել, թե ինչպե՞ս բանակցել տվյալ ղեկավարի հետ կամ ի՞նչ որոշումներ ընդունել, եթե խնդիր ունես այդ երկրի հետ»: