Գյուղատնտեսությամբ զբաղվողները վարկավորման մատչելիության հետ կապված խնդիրներ ունեն

ԱԺ նիստում կառավարության հետ հարցուպատասխանի ժամանակ ԱԺ ՀՅԴ խմբակցության քարտուղար Աղվան Վարդանյանը հարց ուղղեց կառավարությանը: Նա նշեց, որ մոտենում է գյուղատնտեսական աշխատանքների շրջանը, և կան խնդիրներ` վարկավորման մատչելիության հետ կապված: Ի՞նչ քայլեր է ձեռնարկում կառավարությունը` այդ առումով:

Գյուղատնտեսության նախարար Սերգո Կարապետյանը նշեց, որ, հաշվի առնելով կլիմայական պայմանները, կառավարությունն արդեն ձեռնարկել է միջոցառումներ` գյուղատնտեսական տնտեսություններին օժանդակելու համար: Ծրագրերը պարարտանյութերի, սերմացուների, դիզվառելիքի տրամադրման ուղղությամբ շարունակվում են, դրանք տրամադրվելու են նույն գներով, ինչ անցյալ տարի:

Նախարարը հույս հայտնեց, որ կառավարությունը կկարողանա գյուղացիների պահանջարկը բավարարել: Վարկավորման հետ կապված` նշեց, որ երկու տոկոսով վարկերի սուբսիդավորումը կբարձրացվի, այս տարի կառավարությունը դրա համար հատկացնելու է 1 միլիարդ 357 միլիոն դրամ: