Առանց գրավի սպառողական վարկեր գրեթե չեն տրամադրվում

Այն, որ ֆինանսական շուկայում այս պահին հարաբերական անդորր է, դա դեռեւս չի խոսում այն մասին, որ բանկային համակարգում ամեն ինչ նորմալ է: Կենտրոնական բանկը շարունակաբար կրկնում էր, որ բանկերն այսօր ի զորու են բնակչությանը սպասարկել դոլարով և վարկերով, սակայն իրականությունն այլ բանի մասին է խոսում:

Yerkir.am-ի թղթակիցը, ներկայանալով որպես հաճախորդ, Հայաստանի 10 առևտրային բանկերից հետաքրքրվել է, թե ո՞ր բանկերն են այս պահին տրամադրում սպառողական վարկեր դրամով և առանց գրավի: Հարցման արդյունքում ստացանք հետևյալ պատկերը՝

1. «Կոնվերս բանկ»` տրամադրում է միայն տան, մեքենայի և ոսկու գրավադրմամբ` մինչև 17 տոկոսով վարկեր

2. «ՎՏԲ Հայաստան»` տրամադրում է միայն հիպոթեքային վարկ, ապառիկ և ուսանողական վարկ

3. «Ամերիա բանկ»` տրամադրում է սպառողական վարկ` 24 տոկոսով` մինչև 4 տարի ժամկետով

4. «ԱԳԲԱ Կրեդիտ ագրիկոլ բանկ»` տրամադրում է հիպոթեքային, ուսանողական, ջեռուցման վարկեր: Սպառողական վարկեր անգամ գրավադրմամբ չի տրամադրում:

5. «Արարատ բանկ»` ոսկու գրավով վարկեր, անշարժ գույքի գրավով դոլարային վարկեր կամ սպառողական վարկեր աշխատավարձի եռապատիկի չափով, եթե իրենց բանկով է ստանում աշխատավարձը:

6. «Հայբիզնեսբանկ»` տրամադրում է սպառողական դրամային վարկ` ոսկու գրավով, 24 տոկոսով:

7. «Ինեկոբանկ»` ոչ մի տեսակի վարկ չի տրամադրում:

8. «Զարգացման հայկական բանկ»` տրամադրում են միայն գրավով վարկեր, որը, ինչպես նշեցին, իրենց քաղաքականությունն է: Նախկինում նույնպես այդպես է եղել:

9. «Պրոմեթեյ բանկ»` ֆիզիկական անձանց տրամադրում է 13 տոկոսով, 5 տարի մարման ժամկետով դոլարային վարկեր:

10. «Անելիք բանկ»` տրամադրում է միայն դոլարային վարկեր` մինչև 1400 դոլար կամ 1400 եվրո, 5 տարի մարման ժամկետով, առանց աշխատանքի վայրից տեղեկանքի:

Yerkir.am-ը հարցում է ուղարկել այն առևտրային բանկերին, որոնք չեն տրամադրում այլևս առանց գրավադրման սպառողական վարկեր` պարզելու, թե ո՞րն է նման որոշման հիմնական պատճառը: Պատասխանները ստանալու դեպքում մենք դրանք անպայման կհրապարակենք: