Ըմբշամարտի աշխարհի գավաթ. Հայաստանի հավաքականի մրցակիցները

Շվեյցարիայի Լոզան քաղաքում  տեղի ունեցան  2015 թ. տղամարդկանց հունահռոմեական, ազատ ոճերի  ու կանանց ազատ ոճի ըմբշամարտի աշխարհի թիմային գավաթի խաղարկությունների վիճակահանությունները:

Այս անգամ վերոհիշյալ ստուգատեսերը կազմակերպվում են նոր ձևաչափով. յուրաքանչյուր ձևում մասնակցելու են 2014 թ.  աշխարհի թիմային առաջնության արդյունքերով ուժեղագույն ութնյակում տեղ զբաղեցրած երկրների ըմբշամարտի ընտրանիները: 

Առաջինը պայքարի մեջ կներգրավվեն հունահռոմեական ոճի ըմբշամարտի ներկայացուցիչները: Այս ոճի աշխարհի թիմային գավաթի խաղարկությունը, որին մասնակցելու է նաև հունահռոմեական ոճի Հայաստանի հավաքականը, տեղի է ունենալու փետրվարի 19-20-ին Իրանի մայրաքաղաք Թեհրանում: Այս մրցաձևի գլխավոր ֆավորիտներին՝ Իրանի և Ռուսաստանի ընտրանիներին, նախապես բաժանեցին տարբեր խմբերի: 

Վիճակահանության արդյունքներով` Հայաստանի հավաքականը նախնական փուլում ընդգրկվեց Բ խմբում, որտեղ մրցաշարի առաջին օրը խմբային փուլում կմրցի Ռուսաստանի, Թուրքիայի և Հունգարիայի հավաքականների հետ:

Ա խմբում ընդգրկված են Իրանի, Ադրբեջանի, Շվեդիայի և Գերմանիայի հավաքականները: 

Մրցաշարի 2-րդ օրը հավաքականները  խմբերում զբաղեցրած տեղերին համապատասխան կվիճարկեն 1-ին, 3-րդ, 5-րդ և 7-րդ տեղերը: 

Մարտի 7-8-ին Սանկտ Պետերբուրգում տեղի կունենա կանանց ըմբշամարտի աշխարհի թիմային գավաթի խաղարկությունը, իսկ
ազատ ոճի ըմբշամարրի հավաքականների ելույթյերը տեղի են ունենալու ապրիլի 11-12-ին, ԱՄՆ-ի Լոս Անջելես քաղաքում: Ազատ ոճի Հայաստանի ընտրանին գավաթի խաղարկությանը չի մասնակցի:

Հիշեցնենք, որ 2014 թ. աշխարհի թիմային գավաթակիրները տղամարդկանց թե՛ ազատ և թե՛ հունահռոմեական ոճերում Իրանի ըմբիշներն են, իսկ կանաց ազատ ոճում էլ Ճապոնիայի ընտրանին:  Երեք դեպքում էլ եզրափակիչի մյուս մասնակիցը եղել է Ռուսաստանի ընտրանին: