Ճիշտ եք ասում, որ հասարակ գյուղացին դրա տարբերությունը այդքան էլ չի զգալու. գյուղնախարարը` ԵՏՄ մտնելու մասին

Այսօր գյուղատնտեսության նախարար Սերգո Կարապետյանն իր ամփոփիչ ասուլիսում, պատասխանելով այն հարցին, թե ի՞նչ կտա ԵՏՄ-ն շարքային գյուղացուն, պատասխանեց, որ ԵՏՄ լիարժեք անդամ դառնալուց հետո խնդիրներ չեն լինի արտահանման ոլորտում, որովհետև, ըստ նախարարի, Հայաստանի համար ռուսական շուկան ավանդաբար միշտ եղել է և կլինի:

Նախարարի համոզմամբ` գյուղատնտեսական ոլորտում օգտագործվող բոլոր ռեսուրսները` պարարտանյութերը, գյուղտեխնիկան, թունաքիմիկատները ձեռք են բերվելու ավելի ցածր գնով, որովհետև մաքսային հարկեր արդեն չեն լինելու:

«Այո, ճիշտ եք ասում, որ հասարակ գյուղացին դրա տարբերությունը այդքան էլ չի զգալու: Դրա համար էլ մենք սկսել ենք կոոպերացիաների խնդիրը լուծել: Արդեն ունենք 150 կոոպերատիվներ, որտեղ գյուղացիական տնտեսությունները միասնական աշխատանք են կազմակերպում: Ամբողջ հանրապետությունով մեկ կոոպերատիվներ ձևավորելը դժվարին գործընթաց է, բայց այդ խնդիրը պետք է լուծվի»,- ասաց Սերգո Կարապետյանը` հույս հայտնելով, որ եկող տարի ԱԺ-ն կվավերացնի կոոպերատիվների մասին օրենքը:

Նախարարը շեշտեց, որ ԵՏՄ մտնելուց հետո պետք է առավել ուշադրություն դարձնել գյուղմթերքի որակին ու անվտանգությանը, քանի որ հայկական ապրանքը պետք է մրցունակ դառնա ԵՏՄ շուկայում:

«ԵՏՄ շուկան մեզ համար ամենամեծ շուկան է, հեշտ ենք հարաբերվում: Մենք բավական հաջողություններ ենք ունենալու այդ շուկայում, և համոզված եմ, որ գյուղմթերքի արտադրության ծավալները եկող տարի կմեծացնենք»,- ասաց նա: