ԵՏՄ-ի «գինը»՝ 250-270 մլն դոլար

Այսօր ԱԺ տնտեսական հարցերի մշտական հանձնաժողովի նիստում, երբ քննարկվում էր Հայաստանի կողմից ստորագրված` ԵՏՄ-ին միանալու մասին պայմանագիրը, ԱԺ ԲՀԿ խմբակցության պատգամավոր Միքայել Մելքումյանը հարցրեց կառավարությունը ներկայացնող և ԵՏՄ անդամակցության բանակցությունները վարող` ՀՀ ֆինանսների փոխնախարար Սուրեն Կարայանից` արդյո՞ք Հայաստանը չի կորցնում իր ինքնիշխանության որոշակի մասը` անդամակցելով ԵՏՄ-ին:

Նաև հարցրեց, թե ԵՏՄ «կաթսայում» ինչպե՞ս է որոշվել Հայաստանի մասնաբաժինը` 1,13 տոկոսը, ի՞նչ պահանջներ է ներկայացնելու ԵՏՄ-ն Առևտրի համաշխարհային կազմակերպությանը, որի անդամ է Հայաստանը:

Սուրեն Կարայանը պատասխանեց, որ Հայաստանի համար ինքնիշխանության հարց կառաջանա այնքանով, որքանով որ ԵՏՄ կայացրած որոշումները պարտադիր են լինելու Հայաստանի համար:

«Մեր մասնաբաժինը ԵՏՄ «կաթսայում» լինելու է 1,13 տոկոս, դա որոշվել է պարզ հաշվարկների ու բանաձևերի միջոցով, այսինքն` այս մասնաբաժինը որոշելիս որևէ ուրիշ հանգամանք դեր չի խաղացել: Դա կազմում է մոտ 250-270 միլիոն դոլարին համարժեք դրամ»,- ասաց Սուրեն Կարայանը` հավելելով, որ ԵՏՄ-ին անդամակցելուց հետո նախատեսվում է  համախառն ներքին արդյունքի 1,2 տոկոս աճ:

Ինչ վերաբերում է Առևտրի համաշխարհային կազմակերպության հետ Հայաստանի հարաբերություններին, որովհետև մաքսատուրքերի դրույքաչափերի մասով Հայաստանն ուներ պարտավորություններ Առևտրի համաշխարհային կազմակերպությանը, և ԵՏՄ-ին անդամակցելով` խախտվելու էին այդ պարտավորությունները, ֆինանսների փոխնախարարն ասաց, որ ԵՏՄ-ն նախատեսել է այդ իրավակարգավորումները: