ՀՀ-ին հատկացվող 270 մլն դոլարը շատ կարևոր ինդիկատոր է. Վահե Դավթյան

Էներգետիկ անվտանգության հարցերով փորձագետ, տնտեսագիտության դոկտոր Վահե Դավթյանը տելեգրամյան իր ալիքում գրում է.

«Իհարկե, Հայաստանին հատկացվող գումարի չափը կարևոր չէ: Ավելի շուտ՝ այն չունի առաջնային նշանակություն ստեղծված իրավիճակի աշխարհաքաղաքական գնահատման համար:

Սակայն չմոռանանք, որ աշխարհաքաղաքականության հիմքում հաճախ դրված է հենց տնտեսական գործոնը: Ու այս տեսանկյունից ՀՀ-ին հատկացվող 270 մլն դոլարը շատ կարևոր ինդիկատոր է:

Այն ցույց է տալիս ոչ միայն Հայաստանի «վեստեռնիզացման» մերկապարանոց լինելը, այլև բացահայտում է եվրոատլանտիկ կենտրոնների խիստ սկեպտիկ մոտեցումը առաջիկա տարիներին Հայաստանի տրանսպորտային ապաշրջափակման վերաբերյալ:

«Խաղաղության խաչմերուկ» նախագիծ իրականացնող երկրին անհրաժեշտ է նոր տրանսպորտային համակարգ՝ այն սպասարկող բոլոր ենթահամակարգերով: Համակարգ, որը հնարավոր չի ապահովել 270 մլն-ով:

Հատկանշական է, որ Բրյուսելում եռակողմ հանդիպումից հետո տարածված համատեղ հայտարարության մեջ տնտեսական զարգացման առանցքային ուղղությունների շարքում տրանսպորտային բաղադրիչին թերևս ամենահամեստ տեղն է հատկացված»: