Չորս դաշնակահար` մեկ բեմում` այսօր

Այսօր «Արամ Խաչատրյան» համերգասրահում տեղի կունենա բացառիկ համերգ` բեմում կլինի միաժամանակ 4 դաշնակահար: Yerkir.am-ի հետ զրույցում Հայաստանի պետական կամերային նվագախմբի գեղարվեստական ղեկավար և գլխավոր դիրիժոր, համերգի կազմակերպիչ ու մասնակից Վահան Մարտիրոսյանը նշեց, որ միաժամանակ 4 դաշնամուրով հանդես գալու գաղափարը ծագել է Ժնևի «Վիկտորիա Հոլլ»-ում կայացած համերգից հետո, որտեղ Բախի դաշնամուրային կոնցերտով ինքը հանդես է եկել երեք շվեյցարացի դաշնակահարների հետ:

«Ժնևում նվագում էինք Բախի` 4 դաշնամուրի համար գրած կոնցերտը: 4 դաշնամուրի համար գրված գործերը, ցավոք, քիչ են, և ստիպված ենք լինելու Բախի նույն կոնցերտը ներկայացնել հայաստանյան համերգին, որն, ի դեպ, կլինի հայաստանյան պրեմիերա: Դաշնակահարներից մեկը ես եմ լինելու, մյուսը` ՀՀ վաստակավոր արտիստ Սվետլանա Նավասարդյանը, ինչպես նաև երկու դաշնակահար Ֆրանսիայից` Տրիստան Պֆաֆֆն ու Օլիվիե Պեյրբրյունը»,- ասաց Մարտիրոսյանը:

Ըստ նրա` չորս դաշնակահարով ու նման երգացանկով համերգ Հայաստանում վաղուց չի եղել և դեռ երկար ժամանակ չի լինի:

«Դժվար էր նաև դահլիճ գտնել, որը չորս դաշնամուր ունենա: Մեր դահլիճում այն իրականացնել ուղղակի անհնար էր, դրա համար էլ որոշեցինք «Արամ Խաչատրյան» համերգասրահում համերգն անցկացնել»,- ասաց Մարտիրոսյանը:

Համերգին կմասնակցի նաև կամերային նվագախումբը: