ԱՄՆ կոնգրեսականը կոչ է անում Օբամային` դադարեցնել Ադրբեջանին ռազմական օգնություն ցուցաբերելը

ԱՄՆ կոնգրեսական  Ֆրենկ Փալոնը անդրադարձել է Ադրբեջանի կողմից խոցված ուղղաթիռին: Այդ մասին հայտնում է նրա պաշտոնական կայքէջը:

«Ես վրդովված եմ և տխուր Ադրբեջանի կողմից ուսումնավարժանքների ընթացում ոչնչացված ԼՂ ուղղաթիռի կապակցությամբ: Սա մեկ այլ օրինակ է Ադրբեջանի կառավարության ագրեսիայի՝ ուղղված ԼՂՀ-ի և Հայաստանի դեմ և ցույց է տալիս նրանց բռնի գործողությունների ահագնացումը, որոնք շարունակում են ապակայունացնող ազդեցություն ունենալ տարածաշրջանում: Այսուհետ ԱՄՆ նախագահ Բարաք Օբաման վստահորեն պետք է այնպիսի քայլեր ձեռնարկի, որոնք, վհատեցնելով Ադրբեջանին, կսաստեն նրա բռնի ագրեսիան և ցույց կտան մեր հավատարմությունը խաղաղության եւ կայունության նկատմամբ:  

Ես կոչ եմ անում նախագահ Օբամային՝ պաշտոնապես դատապարտել այս մահացու հարձակումը: Նաև կոչ եմ անում դադարեցնել Ադրբեջանին ցանկացած ռազմական օգնություն ցուցաբերելը, նաև ուժեղացնել «Ազատության աջակցության ակտի» 907-րդ լրացման կիրառումը, որը կսահմանափակի Ադրբեջանի՝ Լեռնային Ղարաբաղի և Հայաստանի դեմ գործողությունները:

Ժամանակն է, որ նախագահն ու Կոնգրեսը նորից ապահովեն ԱՄՆ օրենքի կատարումը, որով Ադրբեջանը կենթարկվի պատասխանատվության իր բռնի գործողությունների համար: Զոհվածների ընտանիքներն ու ԼՂՀ բոլոր քաղաքացիներն իմ մտքերի և աղոթքների մեջ են»,- ասել է ամերիկացի կոնգրեսականը: