26-ամյա տղայի սպանության գործով հետախուզվողն ինքնակամ ներկայացել է քննչական մարմին

Գյումրիում 26-ամյա տղայի սպանության մեջ կասկածվող և հետախուզման մեջ գտնվող Արթուր Մարտիրոսյանն ինքնակամ ներկայացել է նախաքննական մարմնին: Այս մասին Yerkir.am-ին հայտնեցին ՀՀ քննչական կոմիտեից:

Երեկ հայտնել էինք, որ ՀՀ քննչական կոմիտեի Շիրակի մարզային քննչական վարչության վարույթում 26-ամյա Արտյոմ Ադանալյանի սպանության դեպքի առթիվ քննվող քրեական գործի շրջանակներում որոշում է կայացվել քաղաքացի Արթուր Մարտիրոսյանին, որպես մեղադրյալ, ներգրավել գործում` ապօրինաբար մեկ ուրիշին դիտավորությամբ կյանքից զրկելու մեղադրանքով:

Դատարանը բավարարել էր Ա. Մարտիրոսյանի նկատմամբ, որպես խափանման միջոց, կալանավորումը կիրառելու մասին միջնորդությունը, հայտարարվել էր հետախուզում:

Սպանությունը տեղի է ունեցել հոկտեմբերի 29-ին` ժամը 22:15-ին, Գյումրիում: Սրտի շրջանում կտրող-ծակող գործիքից ստացած վնասվածքով Շիրակշին բանավան 217/106 բ հասցեի տնակի բնակիչ` 1988 թվականի ծնված Արտյոմ Ադանալյանը Գյումրու բժշկական կենտրոն տեղափոխվելու ճանապարհին մահացել է: