Ագաթանգեղոս-Արշակունյաց և Արշակունյաց-Նժդեհ հատվածների խցանումները վերացնելու համար էստակադաներ կկառուցվեն

Այսօր ԱԺ-ում` քաղաքաշինության ոլորտի 2015թ. բյուջեի քննարկման ժամանակ, ՕԵԿ-ական պատգամավոր Լևոն Դոխոլյանը հարց ուղղեց քաղաքաշինության նախարարին Արշակունյաց-Գարեգին Նժդեհ փողոցների խաչմերուկում պարբերաբար առաջացող ճանապարհատրանսպորտային խնդիրների, խցանումների ու պատահարների մասին:

«Նախատեսվու՞մ են, արդյոք, այդ հատվածում կառուցապատումներ, որոնք կթեթևացնեն այդ խաչմերուկում առաջացող խնդիրները»,- հարցրեց պատգամավորը:

Քաղաքաշինության նախարար Նարեկ Սարգսյանը նշեց, որ դա քաղաքապետարանի խնդիրն է, իսկ քննարկմանը ներկա Երևանի փոխքաղաքապետ Կամո Արեյանն ասաց, որ Արշակունյաց- Նժդեհ հատվածում կան նախագծեր, կլինեն էստակադային կառույցներ:

«Մի կառույցը կառուցվելու է Ագաթանգեղոս-Արշակունյաց հատվածում` կրկեսին հարող հատվածում, մյուսը կառուցվելու է Արշակունյաց-Նժդեհ հատվածում: Այդ կառույցները նախագծային փուլում են, և հեռանկարում դրանք պետք է իրականացվեն»,- ասաց Կամո Արեյանը: