Թափանցիկության կոալիցիան Ադրբեջանին «սխալներն ուղղելու» ժամանակ է տվել

Մյանմայում նախօրեին տեղի ունեցած` Հանքարդյունահանման ոլորտի թափանցիկություն նախաձեռնության (EITI) վարչության նիստի ժամանակ Ադրբեջանի վերաբերյալ որոշում է կայացվել. հայտնում է contact.az-ը:

Որոշվել է թափանցիկության այդ միջազգային կառույցի շրջանակներում Ադրբեջանի պարտավորությունների իրականացման մոնիթորինգ իրականացնել:

«Վարչությունը հուսով է, որ Ադրբեջանում մեծ հնարավորություններ կստեղծվեն քաղաքացիական հասարակության համար, երկիրը ներդրում կունենա EITI-ի չափանիշների իրականացման գործում»,- ասվում է EITI-ի ղեկավար Քլեր Շորթի հայտարարության մեջ:

Հիշեցնենք, որ Human Rights Watch միջազգային իրավապաշտպան կազմակերպության՝ օրերս հրապարակված հայտարարությունում ասվում էր, որ «EITI-ն պետք է ժամանակավորապես հեռացնի Ադրբեջանին կոալիցիայից և նշի անհրաժեշտ քայլերը անդամության վերականգնման համար: Ադրբեջանի վերջին քայլերը՝  ոչ կառավարական կազմակերպությունների ճնշումը, ցույց են տալիս, որ այդ երկիրն անտեսում է մարդու իրավունքները և միջազգային թափանցիկության պարտավորությունները»: