«Ժառանգություն»-ը և ԲՀԿ-ն չեն պատրաստվում կարդալ սահմանադրական փոփոխությունների հայեցակարգը

Այսօր հրապարակվել է սահմանադրական փոփոխությունների հայեցակարգը: Նախագահի հավանությանն արժանանալուց հետո այն պետք է քննարկման փուլ անցնի նաև քաղաքական կուսակցությունների հետ:

Սակայն Yerkir.am-ի հետ զրույցում «Ժառանգության» և ԲՀԿ-ի ներկայացուցիչները նշեցին, որ չեն պատրաստվում բովանդակային քննարկում ծավալել այդ հայեցակարգի շուրջ:

ԲՀԿ խմբակցության քարտուղար Նաիրա Զոհրաբյանը նշեց. «Չեմ ընթերցել և չեմ էլ ընթերցելու: Հայեցակարգի  բովանդակությունն ինձ համար առ ոչինչ է, որովհետև փոփոխության նպատակը մեկն է` գործող իշխանության քաղաքական մոնոպոլիան երկարաձգել  ևս 10 տարով»: Նա նշեց, որ հասարակությանը հայտնի է ԲՀԿ-ի պաշտոնական տեսակետը սահմանադրական փոփոխությունների վերաբերյալ, ուստի անիմաստ են հայեցակարգի բովանդակային քննարկումները:

«Ժառանգության» փոխնախագահ Արմեն Մարտիրոսյանը նշեց, որ անձամբ ինքը կկարդա հայեցակարգը` զուտ հետաքրքրության համար, սակայն, քանի որ «Ժառանգությունը» համարում է, որ սահմանադրական փոփոխությունները «գենսեկացման» պրոցեսի համար են, ուստի բովանդակային քննարկման մեջ չեն մտնելու: Արմեն Մարտիրոսյանը նշեց, որ «Ժառանգությունը» առաջադրել էր երեք պայման, ոնոց կատարման դեպքում պատրաստ կլիներ բովանդակային քննարկում ծավալել սահմանադրական փոփոխությունների վերաբերյալ, սակայն «Ժառանգության» առաջարկած պայմանները չեն ընդունվել: