«Տերտերյան-Ֆեստ». փառատոնն այս տարի նվիրվում է Ավետ Տերտերյանի ծննդյան 85-ամյակին

Հայաստանի պետական երիտասարդական նվագախումբը հոկտեմբերի 13-ից դեկտեմբերի 11-ը` արդեն հինգերորդ անգամ, անցկացնում է հայ կոմպոզիտորական արվեստի փառատոն, որն այս տարի նվիրվում է հայ անվանի կոմպոզիտոր Ավետ Տերտերյանի ծննդյան 85-ամյա հոբելյանին: «Տերտերյան-Ֆեստի» շրջանակներում կկատարվեն Ավետ Տերտերյանի կամերային, երգչախմբային և սիմֆոնիկ անտիպ ստեղծագործությունները, որոնք մինչ օրս չեն կատարվել:

Փառատոնը ներառում է 7 համերգային երեկո, որոնց ընթացքում կներկայացվեն հայ դասական և ժամանակակից կոմպոզիտորների ստեղծագործություններ: Փառատոնը կանդրադառնա կոմպոզիտոր Էդուարդ Հայրապետյանի 65-ամյա հոբելյանին, համերգային երեկո կնվիրվի անվանի երաժշտագետ Արաքսի Սարյանի հիշատակին: Փառատոնի շրջանակներում Ա. Սպենդիարյանի անվան օպերայի և բալետի ազգային ակադեմիական թատրոնը կներկայացնի Ավետ Տերտերյանի «Երկրաշարժ» օպերան, Արամ Խաչատրյանի անվան «Լարային քառյակը» կկատարի կոմպոզիտորի լարային քառյակը, ինչպես նաև Էդվարդ Միրզոյանի և Վարդ Մանուկյանի ստեղծագործությունները: