Թուրքիայում պոլսահայ ոսկերչին սպանած հայերին ցմահ ազատազրկում է սպառնում

2015-ի փետրվարի 5-ն Ստամբուլի Շիշլի թաղամասում 85-ամյա պոլսահայ Հակոբ Դեմիրջիին սպանելու և նրա տունը կողոպտելու մեջ մեղադրվող՝ ազգությամբ հայ կասկածյալներից 3-ի համար դատախազությունը պահանջել է ցմահ բանտարկություն և 24-ից 41 տարվա ազատազրկում:

Ըստ Ensonhaber61-ի՝ այդ գործով մյուս 9 կասկածյալների նկատմամբ արդարացման որոշում է կայացվել:

Պոլսահայ ոսկերչի տունը կողոպտած և 85-ամյա ծերունու մահվան պատճառ դարձած Արամ Հովհաննիսյանին, Արթուր Այվազյանին ու Սերգեյ Միքայելյանին մեղադրանք է առաջադրվել միանգամից մի քանի հոդվածներով:  

Դեմիրջի ընտանիքի փաստաբան Մեհմեթ Օրալը պահանջել է մեղադրանք առաջադրել նաև մնացած 9 կասկածյալներին: Նրա խոսքով՝ նրանց մեղսունակության վերաբերյալ ևս ապացույցներ կան:

Դատական հաջորդ նիստը տեղի է կունենա փետրվարի 8-ին:

Հիշեցնենք, որ փետրվարի 6-ին Ստամբուլի Շիշլի թաղամասի Հարբիյե Ջումհուրիյեթ պողոտայում գտնվող իր բնակարանում կողոպուտի հետևանքով սպանվել էր հայտնի պոլսհայ ոսկերիչ  հակոբ Դեմիրջին: Հանցագործները կապկպել էին Դեմիրջիին և նրա կնոջը՝ 79-ամյա Սեդա Աիդա Դեմիրջիին, ինչի հետևանքով Հակոբ Դեմիրջին խեղդամահ էր եղել: Հանցագործները  թալանել էին թանկարժեք իրերը և փախուստի դիմել: