Հայկ Կյուրեղյանին ներկայումս առաջադրված է երկու մեղադրանք

Շանթ Հարությունյանի և ընկերների դատավարության առաջին նիստի օրը բողոքի ակցիա անցվացրած` 31-ամյա Հայկ Կյուրեղյանին ևս մեկ մեղադրանք է առաջադրվել:

Հունիսի 12-ին Կենտրոն և Նորք-Մարաշ վարչական շրջանների ընդհանուր իրավասության դատարանի շենքի մոտ նա կրակոցներ էր արձակել ոստիկանների ուղղությամբ: Նրան մեղադրանք էր առաջարվել Քրեական օրենսգրքի 258-րդ հոդվածի 4-րդ մասի հատկանիշներով` զենքի կամ որպես զենք գործածվող առարկաների գործադրմամբ խուլիգանություն կատարելը, որը պատժվում է 4-7 տարվա ազատազրկմամբ:

Yerkir.am-ի հետ զրույցում Հ. Կյուրեղյանի փաստաբան Արա Զաքարյանը նշեց, որ մոտ տասն օր առաջ Կյուրեղյանին նոր` ավելի ծանր մեղադրանք է առաջադրվել` Քրեական օրենսգրքի 316-րդ հոդվածի 2-րդ մասի հատկանիշներով` իշխանության ներկայացուցչի կյանքի կամ առողջության համար վտանգավոր բռնության կատարումը`կապված նրանց կողմից իրենց ծառայողական պարտականությունները կատարելու հետ: Այս հոդվածով պատիժ է սահմանվում 5-10 տարի ժամկետով ազատազրկումը:

Փաստաբանը նշեց, որ համաձայն չէ մեղադրանքի հետ, առաջիկայում համապատասխան քայլեր կարվեն այդ ուղղությամբ: Հայկ Կյուրեղյանը նույնպես, ինչպես նախորդ, այնպես էլ այդ մեղադրանքի դեպքում իրեն մեղավոր չի ճանաչում: