Սպանվածը փորձել է սիրահետել կասկածյալի կնոջը. փաստաբան

Գյումրիի մանկավարժական համալսարանի ռեկտորի եղբոր` 50-ամյա Հարություն Գրիգորյանի սպանության կասկածանքով ձերբակալված է ՊՆ Շիրակի մարզի ռազմական ոստիկանության քրեական հետախուզության բաժնի պետ Արման Կատունյանը: Նրա հանդեպ սակայն դեռևս մեղադրանք չի առաջադրվել: Ձերբակալության ժամկետի ավարտին դեռևս մեկ օր կա:

Ոստիկանության տարածած հաղորդագրության համաձայն` Կատունյանը գերեզմանատան մոտակա կիսաքանդ շինության մոտ վիճաբանել է Հ. Գրիգորյանի հետ, որի ընթացքում նկատելով նրա ավտոմեքենայի հետևի նստելատեղին դրված «Մակարով» տիպի ատրճանակը` վերցրել է այն, սակայն չի հիշում, թե վիճաբանության ժամանակ Հ. Գրիգորյանի վրա ինքը կրակել է, թե ոչ: 

Թե արդյո՞ք  այս ցուցմունքը չի վկայում Կատունյանի աֆեկտի վիճակում գտնվելու մասին, Yerkir.am-ի հետ զրույցում կասկածյալի փաստաբան Երվանդ Վարոսյանը հրաժարվեց պատասխանել, հայտնելով, որ պաշտպանական մարտավարությունից ելնելով այս պահին դեռևս մեկնաբանություններ անել չեն ցանկանում:

Վերջինս հրաժարվեց մեկնաբանել նաև ոստիկանության գործողությունները` իր պաշտպանյալի ցուցմունքի որոշակի հրապարկման մասով:

Ինչ վերաբերում է այն վարկածին,  թե սպանությունը կատարվել է խանդի հողի վրա, Ե. Վարոսյանը հերքեց, նշելով, որ սպանվածի և իր պաշտպանյալի կնոջ միջև սիրային կապեր չեն եղել: Սակայն սպանվածը երկարատև ժամանակ փորձել է սիրահետել Կատունյանի կնոջը, սակայն ամուսինները նրան ամեն կերպ հասկացրել են, որ իր պահվածքն անընդունելի է: