Մեր գլխավոր նպատակը մրցանակային տեղեր գրավելն է. Արմեն Գյուլբուդաղյանց

Արդեն հայտնել ենք, որ «Ալաշկերտ»-ը վերդարձել է Թուրքիայից, որտեղ թիմն անցկացրել է  մեկշաբաթյա ուսումնամարզական հավաք:  Այսօր Արմեն Գյուլբուդաղյանցի սաները մարզում անցկացրեցին «Նաիրի» մարզադաշտում, որից հետո գլխավոր մարզիչը պատասխանեց լրագրողների հարցերին: 

Զրույցի սկզբում Գյուլբուդաղյանցը խոսեց Թուրքիայում անցկացրած ուսումնամարզական հավաքի մասին: «Մեկ շաբաթյա ուսումնամարզական հավաք անցկացրեցինք Թուրքիայի Բոլու քաղաքում: Այնտեղ պայմանները շատ լավ էին՝ հավաք անցկացնելու համար:  Հավաքի ընթացքում անցկացրեցինք 2 ընկերական հանդիպում: Առաջին խաղում 2:1 հաշվով պարտվեցինք իրանական «Սպահան» թիմին: 2-րդ խաղում առավելության հասանք թուրքական «Բալիկեսիրսպոր»-ի  նկատմամբ: Թուրքական թիմի հետ կայացած խաղում մեր թիմը շատ լավ տպավորություն թողեց: Կարողանում էինք ճիշտ պաշտպանվել և սուր հակագրոհներ կազմակերպել: Այդ խաղում վնասվածք ստացավ թիմի ռմբարկու Միհրան Մանասյանը, ով, հավանաբար, մինչ առաջնության մեկնարկը կվերականգնվի»,- ասաց մարզիչը:

-Մինչ առաջնության մեկնարկը համալրումներ կլինե՞ն թիմում:

-Թուրքիայում փորձարկել ենք բուլղարացի հարձակվողի, ով չի արդարացրել սպասելիքները: Այսօր մեզ է միանալու Դուշան Մլադենովիչը: Մրցաշրջանի ընթացքում կլինեն բազում փորձարկումներ և համալրումներ:   

-Ի՞նչ խնդիր է դրված թիմի առջև գալիք մրցաշրջանում:

 Մեր գլխավոր նպատակն է մրցանակային տեղեր գրավելը և գավաթի խաղարկությունում հաջող հանդես գալը: Մինչև վերջ պայքարելու ենք, որպեսզի հասնենք ցանկալի արդյունքի: