Ամիսներ առաջ կատարված դեպքի և ներկայիս հրապարակումների հեղինակները նույն խելքն ունեն. Կարեն Մկրտչյան

Դերասան Կարեն Մկրտչյանն իր հիվանդության և բուժման վերաբերյալ հրապարակված կեղծ նյութերից և մարդկանց կասկածամտությունից  վիրավորված է: Լրագրողների հետ հանդիպման ժամանակ նա այսօր դժգոհեց, թե ամբողջ գումարն իր առողջության համար է հավաքվել, և մարդիկ  ուրախ լինելու փոխարեն, որ այդ  գումարները ծառայել են իրենց նպատակին, ծախսերի հաշվետվություն են պահանջում իրենից: Դերասանը նույն ձեռագիրն է տեսնում ամիսներ առաջ կատարվածի և ներկայիս հրապարակումների մեջ:

«Ես չեմ կարող ասել, որ նույն մարդն է եղել հարվածի ու այս նյութերի հեղինակը, բայց որ նրանց մեջ նույն չար արյունն է հոսում, դա հաստատ է»,- ասաց Կարենը և հավելեց, որ, չնայած փաստերին, շարունակում են չարախոսել: «Ես շատ վիրավորված եմ: Ի՞նչ անեմ, հանե՞մ ամբողջ հագուստս, որ մարդիկ տեսնե՞ն վիրահատության տեղերը»,- ասաց նա:

Բուժման ծախսերի հետ կապված կեղծ փաստաթղթերի մասին շրջանառվող տեղեկություններն ու ֆեյսբուքյան ստատուսները չէ միայն, որ շրջանառվում են: Դերասանի փաստաբան Դավիթ Հունանյանը լրագրողներին ասաց, որ ոստիկանությունում ևս գործեր են նախապատրաստվում:

«Բոլոր տեսակի հրապարակումները ոչ թե փաստերի վրա են հիմնված, այլ ենթադրությունների: Ամեն ինչ անելու ենք և մինչև վերջ ենք գնալու` Կարենի իրավունքները պաշտպանելու համար»,- հայտարարեց նա:

Բանախոսները չպատասխանեցին ոստիկանությունում կազմված  գործերի մասին հարցերին' պատճառաբանելով, որ չեն կարող խախտել գաղտնիության սկզբունքը, և որ այդ հարցերին  կարող են պատասխանել միայն իրավապահ մարմինները: Դերասանն ասաց, որ այլևս  հրապարակավ չի խոսելու բուժման, ծախսերի և ապացույցների մասին: Հայտնեց նաեւ, որ բուժումը կշարունակի հոկտեմբերին: