Հայտնի գործարար Լեւոն Հայրապետյանին ձերբակալել են Մոսկվայում

ՌԴ անվտանգության դաշնային ծառայության աշխատակիցները Մոսկվայում ձերբակալել են աշխարհասփյուռ հայության ամենահարուստ ներկայացուցիչներից մեկին` Լեւոն Հայրապետյանին: Միջոցառումներն իրականացվել են ՌԴ Հետաքննչական հանձնաժողովի` «կինգիսեպյան» հանցավոր խմբավորման գործունեության հետաքննության շրջանակներում. հայտնում է Росбалт-ը:

Լեւոն Հայրապետյանին ձերբակալել են երեկ` հուլիսի 15-ին, «Դոմոդեդովո» օդանավակայանում, որտեղ նա ժամանել էր Մոնակոյից: Նրան տարել են ՌԴ Հետաքննչական հանձնաժողով, պաշտոնապես հայտնել ձերբակալության մասին եւ նշել, որ մոտ օրերս քննիչները դատարան միջնորդություն կներկայացնեն նրա կալանավորման մասին:

Լեւոն Հայրապետյանի` հանցավոր խմբի հետ կապ ունենալու հնարավորության մասին քննիչներին հայտնել է նախկին սենատոր` ցմահ բանտարկված Իգոր Իզմեստեւը: