Տարոն Մարգարյանի բողոքը մերժվել է. քաղաքացին պնդում է, որ դա իր պայքարի արդյունքն էր

Օրեր առաջ Yerkir.am-ը անդրադարձել էր այն խնդրին, որ երկու հարևանների միջև ծագած, իսկ հետագայում արդեն դատարանի միջոցով լուծված վեճին անհարկի միջամտել էր քաղաքապետ Տարոն Մարգարյանը:

Նշենք, որ հարևաններից մեկը քանդել էր սեփական տան իր մասնաբաժինը, սակայն վնասել էր նաև մյուսի մասնաբաժինը` տունը դարձնելով 3 աստիճանի վթարային շենք: Տուժողը` Նազիկո Պալյանը, դատարանով վնասի փոխհատուցում էր պահանջել: Առաջին ատյանի դատարանը բավարարել էր 7 միլիոն դրամի փոխհատուցում տալու պահանջը:

Այս դատական ակտը մտել էր ուժի մեջ, և որոշ ժամանակ անց քաղաքապետ Տարոն Մարգարյանն անձամբ իր ստորագրությամբ վերաքննիչ բողոք էր տարել` պահանջելով բեկանել փոխհատուցում ստանալու պահանջը բավարարող դատական ակտը: Քաղաքապետի բողոքն ընդունվել էր վարույթ, ինչն էլ լուրջ մտահագությունների տեղիք էր տվել քաղաքացի Նազիկո Պալյանին և նրա փաստաբան Տիգրան Հայրապետյանին:

Քիչ առաջ Yerkir.am-ը Նազիկո Պալյանից տեղեկացավ, որ վերաքննիչ դատարանը մերժել է քաղաքապետի բողոքը: «Փաստորեն, այդքան էլ անհույս չէր մեր պայքարը: Եթե սուսուփուս նստեիր, իրավունքներդ չիմանայիր, կբավարարվեր: Ուղղակի ցավալին այն է, որ պիտի պայքարես ակնհայտ բաների համար էլ»,- ասաց նա: