Կրակոցներ` Էջմիածնում. վիրավորվել է գեներալ Սեյրան Սարոյանի եղբորորդին. news.am

NEWS.am-ը հայտնում է, որ Էջմիածնում երեկ՝ հունիսի 18-ի երեկոյան, վիճաբանություն է տեղի ունեցել, հնչել են կրակոցներ, վիրավորվել է ԱԺ ՀՀԿ խմբակցության պատգամավոր, գեներալ Սեյրան Սարոյանի եղբորորդին:

NEWS.am-ի տեղեկություններով՝ երեկ ժամը 17:00-ի սահմաններում Էջմիածնում վիճաբանություն է տեղի ունեցել մեքենաների վազանցի պատճառով:

Գեներալ Մանվել Գրիգորյանի եղբորորդին՝ Արայիկ Գրիգորյանը, մեքենայով վազանց է կատարել, որի պատճառով մյուս մեքենայի վարորդն ու ուղեւորը իջել եւ վիճաբանել են գեներալի եղբորորդու հետ: Վեճին միջամտել է նաեւ գեներալ Սեյրան Սարոյանի եղբորորդին: Հնչել են կրակոցներ, որից վիրավորվել է Սեյրան Սարոյանի ազգականը: Նա ոտքի հրազենային վնասվածք է ստացել:

NEWS.am-ին ոստիկանությունից հայտնեցին, որ հունիսի 18-ի երեկոյան Էջմիածնում անհայտ անձը անկանոն կրակահերթ է բացել, սակայն լրացուցիչ տեղեկություն չտրամադրեցին: