Եթե ժողովրդական բանն ու խոսքը չլիներ, այսօր Թումանյան չէինք ունենա. Գալուստ Սահակյանը՝ Սեյրան Սարոյանի խոսելաոճի մասին

ԱԺ ՀՀԿ-ական պատգամավոր, գեներալ Սեյրան Սարոյանը ոչ թե գողական, այլ ժողովրդական բառապաշարով էր երեկ խոսում խորհրդարանի ամբիոնից: Այս մասին այսօր լրագրողների հետ ճեպազրույցում ասաց ԱԺ նախագահ Գալուստ Սահակյանը:

Հարցին, թե, փաստորեն, երեկվա իր ելույթով Սեյրան Սարոյանը հաստատե՞ց, որ պատգամավոր Արամ Մանուկյանի հանդեպ կիրառված բռնությունն իշխանությունների ձեռքի գործն է` Սերժ Սարգսյանին հայհոյելու համար, Գալուստ Սահակյանը պատասխանեց. «Գիտեք` ազգային կոլորիտով խոսակցությունները, մոտեցումները, ձևավորումները… Կարծում եմ՝ Ազգային ժողովում նրա ելույթը ոչ թե որոշակի ուղղվածություն ուներ` այս կամ այն քաղաքական կամ թեկուզ իրավական տեսակետից, այլ պարզապես խոսքն արժևորվեց նրանով, որ կարելի է հանդուրժող լինել: Այսինքն՝ ես սկսեցի թարգմանել: Համենայն դեպս, տպավորությունս այն էր, որ ելույթը լավ ընդունվեց: Ես ասում եմ ոչ թե ինչ-որ մի կողմին պաշտպանելու համար, այլ խնդիրը երևույթն է, որ դա պետք է չլինի: Մարդը տուն է գնում, ասենք՝ Արամ Մանուկյանը, հարձակվում, ծեծում են: Ինչպիսի գործողություն էլ արած լինի, ինչպիսի թշնամիներ ունենա, համենայն դեպս, բռնությունը դա անասնական զգացում է»:

Հարցին, որ Սեյրան Սարոյանը գողական բառապաշարով էր խոսում ԱԺ ամբիոնից, դա ՀՀԿ-ի համար ընդունելի՞ մոտեցում է, ԱԺ նախագահը պատասխանեց. «Ես չէի ասի՝ գողական բառապաշարով, ժողովրդական բառապաշար է: Այն ռեգիոնում, որտեղ նա ծնվել է, էդ խոսքն օգտագործեց: Բայց, միևնույն ժամանակ, եթե ժողովրդական բանն ու խոսքը չլիներ, այսօր Թումանյան չէինք ունենա, Տերյան չէինք ունենա: Իհարկե, դուք վերլուծում եք քաղաքական կամ ժուռնալիստիկայի որակներով, բայց իմաստը նա չէր, թե ով էր մեղավոր: Իմաստն այն էր, որ պիտի ինչ-որ տեղ հանդուրժողականություն լինի: Ես էլ եմ ասում՝ եթե ինձ հայհոյեն, ես, բնականաբար, պատասխան եմ տալու, բայց համաչափ և շատ գրական լեզվով, որն ավելի զորեղ կլինի, քան ցանկացած հայհոյանք»: