Զենքի վաճառքը կտեսաձայնագրվի. Հովիկ Աբրահամյանին սա դուր եկավ

«Շատ ճիշտ մոտեցում է»,- տեղից այսօր արձագանքեց վարչապետ Հովիկ Աբրահամյանը, երբ  ոստիկանապետ Վլադիմիր Գասպարյանը դեռ չէր հասցրել վերջացնել զեկույցը «Զենքի առևտրի լիցենզավորման կարգը, զենքի առևտրի լիցենզիա ստանալու մասին հայտի և լիցենզիայի ձևերը հաստատելու մասին» համապատասխան  որոշումը նոր պահանջներով լրացնելու մասին:

Իսկ Գասպարյանն ասում էր, որ զենքի առեւտուր իրականացնելու համար նախատեսված տարածքում պետք է տեղադրված լինեն անընդմեջ եւ բարձր որակի տեսաձայնագրում իրականացնող սարքեր:

«Նախագծի ընդունումը կնպաստի հանցագործությունների կանխարգելմանը, դրանց արագ արձագանքմանն ու բացահայտմանը»,- նշեց ոստիկանապետը:

Այսպիսով' այսօրվանից սկսած' 6 ամիս հետո զենքի առևտուր իրականացնելու համար նախատեսված շինության բոլոր մուտքերին, ինչպես նաև անմիջականորեն զենքի վաճառք իրականացնելու համար նախատեսված տարածքներում պետք է տեղադրված լինեն անընդմեջ  բարձր որակի (HD) տեսաձայնագրություն իրականացնող սարքեր՝ օրվա մութ ժամերին նկարահանելու և տեսաձայնագրությունն առնվազն 10 օր պահպանելու հնարավորությամբ:

«Տեսաձայնագրող սարքը զենքի առևտուր իրականացնելու համար նախատեսված շինության դրսի կողմից պետք է տեղադրված լինի այնպես, որ հնարավորություն տա նկարահանելու և հետևելու զենքի առևտուր իրականացնելու համար նախատեսված շինության (դրսի կողմից) մուտքի մոտ կատարվող գործողություններին: Մյուս տեսաձայնագրող սարքը պետք է տեղադրված լինի անմիջականորեն զենքի վաճառք իրականացնելու համար նախատեսված սրահում այնպես, որ հնարավորություն տա նկարահանելու և հետևելու առևտրի սրահում կատարվող գործողություններին»,- սահմանվում է կառավարության կողմից այսօր հավանության արժանացած որոշումով:

Սահմանվում է նաեւ, որ զենքի առևտուր իրականացնելու համար նախատեսված շինության մուտքի դռան երկու կողմից պետք է փակցված լինեն «Տարածքը և դրա շրջակայքը տեսագրվում են» բովանդակությամբ հայտարարություններ: