Պնակալեզ, պատեհապաշտ բ-ի տղերք. Աղվան Վարդանյանը բանաստեղծություն նվիրեց Կիսելյովին պաշտպանողներին

«Ես ուզում եմ մի քանի խոսք ասել Կիսելյովներին պաշտպանողների մասին, բայց չգիտեմ` ուզում եմ ասել, թե չեմ ուզում»,- այսպես բազմանշանակ տողերով անդրադարձավ Կիսելյովի նմաններին պաշտպանողներին ԱԺ ՀՅԴ խմբակցության քարտուղար Աղվան Վարդանյանն այսօր խորհրդարանական ճեպազրույցների ժամանակ:

Նա նշեց, որ կանդրադառնա այդ ամենին իր գրքի մի բանաստեղծությամբ, որը գրվել է 1987-ին: «Այդ ժամանակ ես մտածում էի, որ դա գրում եմ կոմունիստական նոմենկլատուրայի ներկայացուցիչների մասին, ովքեր ամեն ինչ փորձում էին ներկայացնել Խորհրդային միության շահերով: Կարծում էի` բանաստեղծությունը նրանց եմ նվիրում, բայց հասցեատերերի շրջանակն անընդհատ լայնացավ ու պարզվեց, որ դա շարունակական է: Եվ այսօր այդ բանաստեղծությունը նվիրում եմ կիսելյովներին պաշտպանողներին»,- ասաց պատգամավորը:

Պնակալեզ, պատեհապաշտ, բ-ի տղերք,

Անհայրենիք, անսրբություն, անաղուհաց,

Ոչինչ մաքուր չմնաց, որ չպղտորեք

Ձեր արածը հիմա պիտի գա ձեր դիմաց:

Գալու է Ձեր զավակների պատկերն առած,

Որ քշվելով ձեր ավերից խեղված ու բութ

Անեծքով են օրհնելու ձեր սաղմը սառած,

Ու դռնեդուռ մուրալու են ներում ու գութ:

Մուրալու են չեն գտնելու լույսի մի շերտ

(Դուք չեք թողել, իսկ նա ինքնին չի բազմանում),

Եւ ձեր որդիք ամեն անգամ երբ ձեզ հիշեն,

Ձեր աճյունը պղծվելու է գերեզմանում: