Ռեյիսին խնդրում է իրենց հանձնել Հայաստանում պատիժ կրող Իրանի 9 քաղաքացուն

Արդարադատության նախարար Հովհաննես Մանուկյանն ընդունել է Հայաստանում Իրանի դեսպան Մոհամմադ Ռեյիսին:

Դեսպանը շնորհակալություն է հայտնել Հայաստանում պատիժ կրող իրանցի դատապարտյալների փոխանցման հարցում Հայաստանի կառավարության դիրքորոշման համար: Դեսպանը նախարարին խնդրել է հնարավորության դեպքում իրականացնել այս պահին Հայաստանում պատիժ կրող Իրանի 9 քաղաքացու փոխանցումը: Նա հույս է հայտնել, որ Հայաստանի կողմից պարբերաբար ցուցաբերվող բարի կամքի դրսևորումն իրանցի դատապարտյալներին հայրենիք վերադարձնելու գործում կշարունակվի:

Կողմերն անդրադարձել են նաև Հայաստանի և Իրանի միջև դատապարտյալների փոխանցման մասին համաձայնագրին: Հայաստանի և Իրանի միջև դեռ 2006 թ.-ից գործում են նաև Թեհրանում ստորագրված Հայաստանի և Իրանի միջև քաղաքացիական և քրեական գործերով իրավական համագործակցության մասին և Հայաստանի և Իրանի միջև հանձնման մասին համաձայնագրերը:

Հովհաննես Մանուկյանը պատրաստակամություն է հայտնել իրանցի գործընկերոջ հետ հետագայում ևս քննարկել երկու հարևան երկրների համագործակցության առաջնահերթությունները: Այս մասին հայտնում է ՀՀ արդարադատության նախարարության կայքը: