«Այբ»-ի կրթական ավանը կզբաղեցնի 7 հա տարածք

Վարչապետ Հովիկ Աբրահամյանն այցելել է «Այբ» ավագ դպրոց, որտեղ ծանոթացել է աշակերտների համար ստեղծված պայմաններին, կրթական գործընթացներին և առաջիկա ծրագրերին:

Առաջիկա տարիների ընթացքում նախատեսվում է 7 հա տարածքի վրա կառուցել կրթական ավան՝ տարրական, միջին և ավագ դպրոցի նոր մասնաշենքերով, մարզական համալիրով, արվեստի կենտրոնով: Ծրագրվում է մոտ ժամանակներս դպրոցում հիմնել արդիական սարքավորումներով համալրված լաբորատորիա, որտեղ կիրականացվեն ռոբոտաշինության և ինժեներական ծրագրեր:

Դպրոցի կրթական գերազանցության կենտրոնի ծրագիրը նախատեսվում է իրականացնել կառավարության հետ համատեղ: Այս ուսումնական տարվանից «Այբի» տարրական դպրոցի աշակերտների թիվը հասել է 82-ի, իսկ ավագ դպրոցինը՝ 260-ի: Այս ուստարում կբացվի նաև միջին դպրոցը: Սոցիալական ուղղվածություն ունեցող ավագ դպրոցի աշակերտների մոտ 80 տոկոսն ուսանում է բարերարների հատկացրած կրթաթոշակներով:

Կառավարության կայքի հաղորդմամբ` «Այբ» կրթական ավանում շարունակվում են նաև Սրբոց Թարգմանչաց եկեղեցու կառուցման աշխատանքները: Եկեղեցին կնվիրաբերվի Մայր աթոռ սուրբ Էջմիածնին: