«Դեմ եմ»-ը գոհ չէ փոփոխված օրինագծից. բողոքի ակցիաները կշարունակի

«Դեմ եմ» նախաձեռնության անդամերը շարունակելու են բողոքի ակցիաները, քանի որ «Կուտակային կենսաթոշակային համակարգի մասին» փոփոխված օրինագծում իրենց պահանջները բավարարված չեն: Այս մասին «Մեդիա կենտրոնում» հրավիրված ասուլիսի ժամանակ հայտարարեց նախաձեռնության անդամներից Տիգրան Մարտիրոսյանը` նշելով, սակայն, որ դեռևս որոշված չէ, թե ինչ ձևաչափով կլինեն ակցիաները: «Կարծես թե կառավարությունն այս քայլով ցույց է տալիս, որ նախորդ կառավարության ձախողված քաղաքականությունն է առաջ տանելու»,-ասաց նա:

Հիշեցնենք, որ երեկ ԱԺ-ում երկրորդ ընթեցմամբ ընդունվեց «Կուտակային կենսաթոշակների մասին» ՀՀ օրենքում փոփոխություններ անելու մասին նախագիծը: Անդրադառնալով փոփոխված օրինագծի բացերին՝ նախաձեռնության անդամ Դավիթ Խաժակյանն ասաց. «Սա ձեռքբերում է, առաջընթաց է, սակայն կան բազմաթիվ վերապահումներ, որոնք առաջացնում են խնդիրներ: Մասնավորապես՝ ասվում է, որ պետք է դիմումներ գրեն, որպեսզի հրաժարվեն այդ համակարգի մասնակցությունից, դա անտրամաբանական է: Այսինքն՝ եթե 80 տոկոսն է դեմ, ինչու՞ նա գրի, փոխարենը եթե կարող է այն 20 տոկոսը գրել և միանալ համակարգին»:

Խոսելով այն գումարների մասին, որը պետք է փոխանցի կառավարությունը այդ ֆոնդերին, Խաժակյանը նշեց, որ այդ եղանակով կառավարությունը լուծում է գումարները ֆոնդերին փոխանցելու խնդիրը, ինչը Սահմանադրական դատարանը վիճելի էր դարձրել` նշելով, որ ԿԲ-ի դերը չարաշահված է:

«Դա նշանակում է, որ կառավարությունը գործի է դնում մի մեխանիզմ, որը Սահմանադրական դատարանն արդեն իսկ հակասահմանաադրական է ճանաչել: Այսինքն՝ մենք այսքան ժամանակ պայքարել ենք պարտադիրի դեմ, ստացվում է, որ անձի մասնակցությունը համակարգին դարձել է կամավոր, բայց համակարգը մնացել է պարտադիր»: Նա նույնպես ընգծեց, որ պայքարը պետք է շարունակվի, որպեսզի օրինագծում առկա վիճահարույց կետերը ևս շտկվեն: