Փոփոխված օրենսգրքով ընդդիմության ներկայացուցիչը դառնում է "գործող անձ"

Կատարված փոփոխություններից Դավիթ Հարությունյանը հատկապես կարեւորեց այն, որ «ընդդիմության վստահված անձի համար ընտրական հանձնաժողովի երկու անդամների արանքում տեղ կհատկացվի», որպեսզի նա կարողանա վերահսկել ընտրությունների ընթացքը: Նա շեշտեց, որ փոփոխված օրենսգրքով ընդդիմության ներկայացուցիչը դառնում է «գործող անձ»  եւ նստում հանձնաժողովի անդամի կողքին: 

Անդրադառնալով խորհրդարանական ընդդիմության, հատկապես` ՀՅԴ-ի մեղադրանքներին, թե իրենց հիմնական առաջարկները չեն ընդունվել, Դ. Հարությունյանն ասաց, որ դրանք քաղաքական հայտարարություններ են, իսկ ընդունված առաջարկությունների մասին ՀՅԴ-ն գերադասում է լռել:

Այնուհանդերձ, նա նշեց, որ ոչ մի երկրում հարյուր տոկոսով հնարավոր չէ բացառել ընտրակեղծիքները: Նրա խոսքով՝ ինչ-որ խախտումներ կարող են լինել, բայց իրենք հնարավոր ամեն ինչ արել են` դրանք բացառելու համար, անգամ փորձել են «կանխագուշակել», թե ինչ նոր մեխանիզմներ  կարող են ծնվել, եւ կանխարգելիչ փոփոխություններ մտցնել՝ հաշվի առնելով, թե հնարամտությունը ինչ նոր մեխանիզմներ հորինելու հնարավորություն կարող է տալ: