16-ամյա աղջիկն է հորինել իրեն թրաֆիքիգի ենթարկելու պատմությունը. փաստաբան

Եթե կա հանցանք այս պատմության մեջ, ապա դա միայն տուժողի գործողություններում կարելի է գտնել: Այս միտքն էր շեշտում փաստաբան Մարինե Թովմասյանն իր պաշտպանական ճառում` 16-ամյա աղջկան թրաֆիքինգի ենթարկելու գործով:

Փաստաբանի պնդմամբ` թրաֆիքինգի մասին այս պատմությունը հորինվել է տուժող Արևիկի (անունը փոխված է) կողմից, և դատարանը պարտավոր է օբյեկտիվ գնահատական տալ գործում առկա փաստերին ու դրանք ի վնաս իր պաշտպանյալի` 25-ամյա Ռ.Մ.-ի չմեկնաբանել:

«Շատ վատ քայլ է արել հենց Արևիկը: Նրա հորինած պատմության պատճառով մարդն արդեն երկու տարի անազատության մեջ է, իսկ մեկն էլ 11 տարվա ազատազրկման է դատապարտվել»,- նշեց փաստաբանը:

Նա իր պաշտպանական ճառում նշեց, որ չկա իր պաշտպանյալի մեղադրանքն ապացուցող փաստերի բազա: Հիմնավորված չէ Ռ.Մ.-ի կողմից դիտավորությամբ հանցանք կատարելու փաստը, հիմնավորված չէ այդ քայլին դիմելու միտումը, հավաքագրելու փաստը, ապացուցված չէ նաև, թե ինչ եղանակով է թրաֆիքինգի ենթարկել` բռնությամբ, խաբեությամբ և այլն:

Մ. Թովմասյանը նշեց, որ իր պաշտպանյալի ցուցմունքները լիովին ճիշտ են այն մասով, որ ռուսաստանյան խրճիթը, որտեղ ապրել են, բավականին վատ պայմաններ է ունեցել, և նույնիսկ «նորմալ դանակ չի եղել, որ դեռ Արևիկի կոկորդին դրեր», երբ աղջիկը ծնողների հետ հեռախոսով խոսելիս է եղել:

Փաստաբանը, վկայակոչելով գործով անցնող վկաների ցուցմունքները, նշեց, որ հաստատված է համարվում այն, որ Արևիկը հարկադրված, առավել ևս ֆիզիկապես ծանր աշխատանք չի կատարել: Իսկ հողագործությամբ զբաղվել է գործով մյուս մեղադրյալ, արդեն 11 տարվա ազատազրկման դատապարտված Քրիստինեի և Ռ.Մ-ի հետ հավասար:

Փաստաբանն իր ելույթն ավարտեց` միջնորդելով դատարանին արդարացնել իր պաշտպանյալին` նշելով, որ դատարանը չպետք է հուսախաբված և վրեժխնդրությունից դրդված այս պատմությունը հորինած աղջկա ցուցմունքների հիման վրա դատապարտի Ռ.Մ-ին:

Ի պատասխան պաշտպանի` ռեպլիկով հանդես եկան մեղադրանքը պաշտպանող դատախազ Արիս Բաղդասարյանն ու տուժողի փաստաբան Օլգա Սաֆարյանը:

Դատախազը նշեց, որ Մ. Թովմասյանը գործում առկա ապացույցները մեկնաբանում է յուրովի և իր պաշտպանյալի համար ցանկալի տեսանկյունից` իր խոսքում բազմիցս օգտագործելով «եթե» բառը, ինչը նշանակում է, որ ոչ թե փաստերն է վկայակոչում, այլ ենթադրություններ անում: Եվ այս դեպքում չի անդրադարձել կարևոր մի հանգամանքի` թե ինչո՞ւ է Ռ.Մ-ն իր սիրուհուն` մարմնավաճառ Քիստինեին, Արևիկին ու նրա ծնողներին որպես իր քույր ներկայացրել:

Հիշեցնենք, որ մեղադրյալ Ռ.Մ-ն, համաձայն մեղադրականի, 2011 թվականի հուլիսին իր հանցակցի հետ անչափահաս` 16-ամյա Արեւիկին ՀՀ Բագրատաշենի սահմանային կետով շահագործման նպատակով տեղափոխել էին ՌԴ Մինվոդի քաղաք: Այնտեղ աղջկա փախուստը կանխելու նպատակով վերցրել էին նրա անձնագիրը, ապա, բռնություն գործադրելով, փորձել էին ներգրավել պոռնկության մեջ՝ ստիպելով զբաղվել մարմնավաճառությամբ և աշխատած գումարները փոխանցել իրենց: Սակայն տեսնելով, որ աղջիկը դիմադրում է,  պարտադրել էին Մինվոդի քաղաքին հարակից Նագուտսայա գյուղում գբաղվել հողագործությամբ: 

Հաջորդ դատական նիստում` մայիսի 22-ին, ամբաստանյալը կասի իր վերջին խոսքը, որից հետո դատարանը կանցնի խորհրդակցական սենյակ: