Մեղադրյալի աթոռին նստած հարկադիր կատարողին «քցել» են

30-ամյա Գևորգ Հարությունյանը մեղադրվում է 60 հազար դրամ կաշառք վերցնելու և դրա դիմաց ապօրինի գործողություններ կատարելու համար:

Շենգավիթի վարչական շրջանի ընդհանուր իրավասության դատարանը` դատավոր Ալեքսանդր Ազարյանի նախագահությամբ, սկսեց Գ. Հարությունյանի դեմ հարուցված գործի քննությունը:  Հարությունյանն ամուսնացած է, ունի երկու անչափահաս երեխա, ավագ լեյտենանտ է և Դատական ակտերի հարկադիր կատարման ծառայության աշխատակից`  Մալաթիա-Սեբաստիա բաժնի հարկադիր կատարող:  

Համաձայն մեղադրականի` Գևորգը  նախորդ տարվա նոյեմբերի 27-ին արդարադատության նախարարության վարչական շենքում հանդիպել է գործով անցնող վկաներ Կարեն Եդիկյանին և նրա կնոջը՝ Քնարիկ Սելոյանին, նրանցից տեղեկացել, որ իր կատարողական գործողությունների արդյունքում Կարեն Եդիկյանի բանկային հաշվեհամարի վրա արգելանք է դրվել: Գևորգը բացատրել է, որ կատարել է իր աշխատանքը` ապահովել դատական ակտի կատարումը, և հաշվեհամարի 127 հազար դրամը սառեցվել է «ԱրմենՏել» ընկերության կողմից ներկայացված կատարողական թերթի հիման վրա:

Հաջորդ օրը Գևորգը նորից հանդիպել է ամուսինների հետ, խոստացել, որ հաշվեհամարի վրա դրված արգելանքը կարող է ժամանակավորապես հանել, որպեսզի կարողանան գումարը կանխիկացնել: Սակայն այդ «ծառայության» դիմաց Գևորգը 60 հազար դրամ է պահանջել: Համաձայնության են եկել: Գևորգն արգելանքը հանել է հաշվեհամարի վրայից: Կարենը գումարը կանխիկացրել է, սակայն հրաժարվել է Գևորգին վճարել խոստացված 60 հազար դրամը: Գևորգը մի քանի օր շարունակ փորձել է հեռախոսով կապի հաստատել ամուսինների հետ, սակայն` ապարդյուն: Կարճ հաղորդագրություններ է գրել, զանգահարել է նաև Կարենի կնոջը, ով սկզբում չի պատասխանել, այնուհետև հայտնել է, թե ամուսինը Հայաստանում չէ:

Կինը, սակայն, չդիմանալով Գևորգի կողմից իր և ամունսու հասցեին ուղղված  տևական սպառնալիքներին, դեկտեմբերի 2-ին դիմել է ոստիկանություն: Իսկ դեկտեմբերի 3-ին 60.000 դրամ կաշառքը ստանալու պահին Գևորգը ձերբակալվել և բերման ենթարկվել ոստիկանություն:

Նշենք նաև, որ Գևորգ Հարությունյանին մեղադրանք է առաջադրվել  Քրեական օրենսգրքի 311-րդ հոդվածի 2-րդ մասով, խափանման միջոց ընտրվել է կալանքը:

Դատական հաջորդ նիստը տեղի կունենա մայիսի 20-ին: