Քառյակ, որպես այդպիսին, չկա. Րաֆֆի Հովհաննիսյան

«Ժառանգություն» կուսակցության նախագահ Րաֆֆի Հովհաննիսյանը պաշտոնյաների փոփոխություններից որևէ ակնկալիք չունի:

«Ես չեմ համարում, որ սահմանադրական իշխանափոխություն նշանակում է Սարգսյանին փոխել Աբրահամյանով, կամ Աբրահամյանին փոխել Սահակյանով»,- լրագրողների հետ հանդիպման ժամանակ հայտարարեց նա:

Անդրադառնալով ԱԺ նախագահի երեկվա ընտրություններին` «Ժառանգության» ղեկավարը նշեց, որ իր համար ցավալի է, որ չկա միասնական մոտեցում: Խոսելով խորհրդարանական չորս ուժերի հետագա համագործակցության մասին` Հովհաննիսյանն ասաց, որ համագործակցությունը կշարունակվի:

«Այս շաբաթների ընթացքում չորս ուժերը որոշակի ճշտումներ կանեն: Մենք ժողովրդին խոստացել ենք միասնական հրապարակ և համակարգային փոփոխություններ»,- հայտարարեց Հովհաննիսյանը և հավելեց. «Քառյակ, որպես այդպիսին, չկա, կան խորհրդարանական չորս ուժեր, որոնք համագործակցում են»:

Նա նշեց նաև,  որ 4 ուժերի մոտ այսօր  բացակայում է միասնական օրակարգը: