Մենք նախարար չունենք. մանկավարժները դասադուլով կպատասխանեն Աշոտյանի արհամարհանքին

ՀՀ կրթության և գիտության նախարարության շենքի առջեւ շարունակվում է տասնյակ ուսուցիչների, դասախոսների և «Դեմ եմ» շարժման անդամների կազմակերպած բողոքի ակցիան: Ակցիայի մասնակիցներն արդեն մեկ ժամ է, ինչ պահանջում են վերանշանակված նախարար Արմեն Աշոտյանից` իջնել ցած և լսել իրենց, սակայն` ապարդյուն:

Գիտության ոլորտի աշխատակիցներից մեկը, ով դժգոհում էր ցածր վարձատրությունից, հայտարարեց, որ եթե նախարարը շարունակի իրենց անտեսել և չիջնել, իրենք կսկսեն տևական դասադուլներ և գործադուլներ: Ուսուցիչներից մեկն էլ հայտարարեց, որ Աշոտյանը գողեգող հեռացել է նախարարության շենքից:

Քիչ առաջ ներքև իջավ նախարարության հասարակայնության հետ կապերի և մամլո պատասխանատու Արթուր Բաղդասարյանը: Նա վերցրեց մանկավարժների նամակը և խոստացավ այն փոխանցել Աշոտյանին: Բաղդասարյանը ևս մեկ անգամ նշեց,  որ նախարարը պատրաստ է հանդիպել ուսուցիչների հետ,  սակայն ուսուցիչներն անդրդվելի էին: «Թող Աշոտյանն անձամբ ներքև իջնի»,- պահանջեցին մանկավարժները:

Այս պահին ակցիայի մասնակիցները կամաց-կամաց ցրվում են: «Ինչպես մինչև Աշոտյանի վերանշանակումը մենք չունեինք նախարար, այնպես էլ հիմա` մենք այդպես էլ կրթության և գիտության նախարար չունեցանք»,- հայտարարեցին մանկավարժները: