ԱՄՆ-ը ցանկանում է պատժել Ռուսաստանին, բայց ոչ` միայնակ

Մալայզիայում գտնվող ԱՄՆ նախագահ Բարաք Օբաման այդ երկրի մայրաքաղաք Կուալա-Լումպուրում մամուլի ասուլիս է տվել, որում ընդգծել է, որ միայն ԱՄՆ-ի պատժամիջոցները Ռուսաստանի դեմ, առանց Եվրոպայի աջակցության, չեն կարող արդյունավետ լինել:

“ԱՄՆ-ը կարող էր ավելի արդյունավետ կերպով զսպել Ռուսաստանի նախագահ Վլադիմիր Պուտինին, եթե աշխարհը միավորվեր Մոսկվայի դեմ պատժամիջոցներ կիրառելու հարցում, հետևաբար` ԱՄՆ-ը և ԵՄ-ն պետք է համաձայնեցված գործեն այս հարցում”,- հայտարարել է Օբաման:

Նշենք նաև, որ ԱՄՆ նախագահը Ռուսաստանին, կոնկրետ` Պուտինին, մեղադրել է նրանում, որ Ժնեւի համաձայնության կնքումից հետո “նա մատը մատին չտվեց”, որպեսզի օգնի Ուկրաինայի ճգնաժամի կարգավորմանը: Օբամայի խոսքով՝ գոյություն ունեն վկայություններ այն մասին, որ Ռուսաստանը խրախուսում է Ուկրաինայի հարավ-արեւելքում իրավիճակի ապակայունացումը: “Միջազգային նոր պատժամիջոցները, որոնք կկիրառվեն Մոսկվայի դեմ, Ռուսաստանին կստիպեն հասկանալ, որ պետք է վերջ տալ սադրանքներին”,- նշել է նա: