Ուղղափառության միջխորհրդարանական վեհաժողովի հայտարարությունը Քեսաբի դեպքերի վերաբերյալ

ՈՒղղափառության միջխորհրդարանական վեհաժողովը /ՈՒՄՎ/, տեղեկացված լինելով հյուսիսարևմտյան Սիրիայում, հատկապես հայաբնակ Քեսաբ քաղաքում և մոտակա 12 գյուղերում ողբերգական վերջերս տեղի ունեցած իրադարձությունների մասին,

-դատապարտում է բռնի գործողությունները և Քեսաբ քաղաքի խաղաղ հայ բնակչության բռնի տեղահանումը,

-խոր անհանգստություն ու վրդովմունք է արտահայտում զինված խմբավորումների անօրինական գործողությունների կապակցությամբ, որոնք պղծել են քաղաքի հայկական եկեղեցին և զգալի վնաս հասցրել անպաշտպան բնակիչների ունեցվածքին,

-հարգանք է պահանջում Սիրիայի էթնիկ ու կրոնական փոքրամասնությունների նկատմամբ,

-կոչ է անում պատգամավորներին, ՈՒՄՎ անդամ երկրների կառավարություններին, ինչպես նաև միջազգային հանրությանը դատապարտել խաղաղ քաղաքացիական բնակչության նկատմամբ այդ գործողությունները և միջոցներ ձեռնարկել բռնի տեղահանվածների անվտանգության ապահովման, նրանց անվտանգ վերադարձի ու անհրաժեշտ հումանիտար օգնության տրամադրման համար: