3 ամսում ՌԴ քաղաքացիություն ստանալ ցանկացողները պետք է բնակվեն ՌԴ-ում. Պետդուման վերջնականապես հաստատեց օրենքը

Արդեն հայտնել ենք, որ ապրիլի 1-ին ՌԴ Պետդուման առաջին ընթերցմամբ ընդունել էր հեշտացված կարգով ՌԴ քաղաքացիություն տրամադրելու վերաբերյալ օրինագիծը: Այսօր` ապրիլի 4-ին, Պետդուման ընդունեց օրենքը նաև 2-րդ և 3-րդ ընթերցմամբ:

Հիշեցնենք, որ օրինագիծը, որն առաջարկել էր ՌԴ Միգրացիոն ծառայությունը, ենթադրում է, որ այն օտարերկրացիները, կամ նրանց մոտ հարազատները, որոնք բնակվում են կամ բնակվել են ՌԴ տարածքում, կամ նախկին ԽՍՀՄ-ում և Ռուսական կայսրության տարածքում (ժամանակակից Ռուսաստանի սահմաններում) , վարժ տիրապետում են ռուսերենին (ռուսաց լեզվի կրողներ են), կկարողանան հեշտացված կարգով ՌԴ քաղաքացիություն ստանալ 3 ամսվա ընթացքում:

Կստեղծվի հատուկ հանձնաժողով, որը հարցազրույցի միջոցով կստուգի օտարերկրացիների ռուսերենի իմացությունը: Անհրաժեշտ է, որպեսզի նրանք վարժ տիրապետեն ռուսերենին և օգտագործեն այն առօրյայում: 

Պարտադիր պայմանը օտար պետության  քաղաքացիությունից  հրաժարվելն է: ՌԴ քաղաքացիություն ստանալ ցանկացող անձը պետք է բնակվի Ռուսաստանում: