Մնում է` Պուտինը ստորագրի 3 ամսում ՌԴ քաղաքացիություն ստանալու մասին օրենքը

ՌԴ Դաշնային խորհուրդը ապրիլի 16-ին հավանության է արժանացրել հեշտացված կարգով ՌԴ քաղաքացիություն տրամադրելու վերաբերյալ օրինագիծը:

Ավելի վաղ 1-ին, 2-րդ և 3-րդ ընթերցմամբ օրինագիծն ընդունել էր նաև ՌԴ Պետդուման:

Հիշեցնենք, որ օրինագիծը, որն առաջարկել էր ՌԴ Միգրացիոն ծառայությունը, ենթադրում է, որ այն օտարերկրացիները կամ նրանց հարազատները, ովքեր բնակվում են կամ բնակվել են ՌԴ տարածքում կամ նախկին ԽՍՀՄ-ում և Ռուսական կայսրության տարածքում (ժամանակակից Ռուսաստանի սահմաններում), վարժ տիրապետում են ռուսերենին, կկարողանան հեշտացված կարգով ՌԴ քաղաքացիություն ստանալ 3 ամսվա ընթացքում:

Կստեղծվի հատուկ հանձնաժողով, որը հարցազրույցի միջոցով կստուգի օտարերկրացիների ռուսերենի իմացությունը: Անհրաժեշտ է, որպեսզի նրանք վարժ տիրապետեն ռուսերենին և օգտագործեն այն առօրյայում:

Պարտադիր պայմանը օտար պետության քաղաքացիությունից հրաժարվելն է: ՌԴ քաղաքացիություն ստանալ ցանկացող անձը պետք է բնակվի Ռուսաստանում:

Այսպիսով՝ օրինագիծը հավանության է արժանացել բոլոր համապատասխան մարմինների կողմից և, որպեսզի սկսի գործել, անհրաժեշտ է միայն ՌԴ նախագահ Վլադիմիր Պուտինի ստորագրությունը: