Ոչ թե հրաժարվել են նոր ատոմակայան կառուցելու մտքից, այլ փող չեն գտել

Հայաստանում նոր միջուկային էներգաբլոկի կառուցման աշխատանքների ձգձգման կապակցությամբ, արդեն տեղեկացրել ենք, անհրաժեշտություն է առաջացել երկարացնել ՀԱԷԿ-ի գործող էներգաբլոկի շահագործման նախագծային գործողության ժամկետը, ինչը կառավարության այսօրվա նիստում հավանության արժանացավ:

Որոշման նախագիծը ներկայացնող` էներգետիկայի եւ բնական պաշարների նախարար Արմեն Մովսիսյանը նշեց, որ կառավարության կողմից ատոմային էներգետիկայի ոլորտում իրականացվող քաղաքականությունը մնում է նույնը` շարունակել բարձրացնել ՀԱԷԿ-ի անվտանգության մակարդակը, մինչեւ շահագործման ավարտը եղած պլանային վերանորոգումների ընթացքում իրականացնել էներգաբլոկի շահագործման երկարացման համար պահանջվող աշխատանքները, միաժամանակ ակտիվացնել հանրապետությունում նոր միջուկային էներգաբլոկի կառուցման աշխատանքները:

Վարչապետ Տիգրան Սարգսյանը հնչեցեց մի հարց, որը հետաքրքրում էր նաեւ լրագրողներին, արդյո՞ք դա նշանակում է, որ Հայաստանը հրաժարվում է նոր ատոմակայանի կառուցման ծրագրից: Այս առումով Արմեն Մովսիսյանը նշեց. «Դրա համար ես հատկապես նշեցի ոլորտում իրականացվող քաղաքականությունը, որ շարունակում ենք ակտիվացնել նոր միջուկային էներգաբլոկի կառուցման հետ կապված աշխատանքները: Այս դանդաղկոտությունը ոչ թե մեզ հետ է կապված, այլ պայմանավորված է միջազգային տնտեսական ճգնաժամով, կապված է աշխարհաքաղաքական շատ գործընթացներից, որոնք հնարավորություն չտվեցին համապատասխան ֆինանսական միջոցներ ապահովել` այս կայանը կառուցելու համար: Հիմա նորից պետք է ակտիվացնենք, պետք է շարունակենք չբավարարող ֆինանսական մասն ապահովել, որպեսզի նոր միջուկային կայանը կառուցենք»: