Եթե ուզում են ինձ հանել Մհեր Մկրտչյանի կենսագրությունից, ապա Մհերին իմ կյանքից հանել չեն կարող. դերասանի այրին

Արդեն տեղեկացրել ենք, որ տարվա կեսերին հանրությանը կներկայացվի Մհեր Մկրտչյանի մասին պատմող մի գիրք, որում ընդգրկված է լինելու Մկրտչյանի այրու` Թամար Հովհաննիսյանի անձնական արխիվից 250-300 լուսանկար` մեկնաբանություններով:

Լրագրողների հետ հանդիպման ժամանակ Թամար Հովհաննիսյանը, անդրադառնալով Մհեր Մկրտչյանի հետ համատեղ կյանքի վերջին տարիների հետ կապված խոսակցություններին, թե ինքը թողել է Մկրտչյանին և հեռացել, նշեց, որ գրքում շատերը գուցե կստանան իրենց հուզող բոլոր այդ հարցերի պատասխանները:

«Իսկ, առհասարակ, ես ոչ մեկին ոչինչ չունեմ պատասխանելու: Դա իմ կյանքն էր: Եթե ցանկություն ունեն ինձ հանել Մհերի կենսագրությունից, ապա Մհերին իմ կյանքից հանել չեն կարող: Եթե այդ մարդիկ կգտնեն իրենց հարցի պատասխանները` լավ, եթե չեն գտնի` շատ ավելի լավ»,- ասաց նա: