Բելառուսը ճանաչո՞ւմ է Ղրիմի հանրաքվեն. պատասխան` Բելառուսի ԱԳՆ-ից

Երեկ Ղրիմում կայացավ թերակղզու կարգավիճակի վերաբերյալ հանրաքվեն: Ըստ պաշտոնական տեղեկատվության` ղրիմցիների 96,77%-ը քվեարկել է Ռուսաստանին միանալու օգտին: Սակայն մի շարք երկրներ՝ ԱՄՆ-ը, Կանադան, ԵՄ-ն, Մեծ Բրիտանիան, Ճապոնիան, Վրաստանը,  հրաժարվել են ճանաչել հանրաքվեն և դրա արդյունքները:

Yerkir.am-ը որոշեց պարզել Բելառուսի դիրքորոշումը, քանի որ հարևան երկիրը չէր շտապել որևէ գնահատական տալ:

Բելառուսի ԱԳՆ-ում մեր հարցին՝ ինչպե՞ս է Բելառուսը վերաբերվում Ղրիմում կայացած հանրաքվեին, լեգիտի՞մ է է համարում այն, թե՞ ոչ, կոնկրետ պատասխան չտվեցին, ընդամենը ասացին. «Բելառուսը շահագրգռված է հարևանների հետ կայուն քաղաքական, տնտեսական, հումանիտար հարաբերություններ ունենալու մեջ: Մենք պատրաստ ենք մեզանից պահանջվող ամեն ջանք գործադրել, որպեսզի Ռուսաստանի և Ուկրաինայի հարաբերությունների բնականոն հունի վերադառնան: Մենք բազմիցս հայտարարել ենք, որ պետք է գտնել խնդիրները լուծելու դիվանագիտական տարբերակներ, երկխոսության միջոցով լուծել դրանք և թույլ չտալ ուժային դիմակայություն ոչ մի կողմից»:

Ի դեպ, արդեն մի քանի ժամ է` փորձում ենք պարզել նաեւ ՀՀ ԱԳՆ-ի պաշտոնական դիրքորոշումը: Ապարդյուն, մեր հեռախոսազանգերն անպատասխան են: