Ուզո՞ւմ եք ասել` այնքան ուժեղ եք... Հրայր Թովմասյան` երբ լսեց Միքայել Մինասյանի անունը

ԱԺ նիստում կառավարության հետ հարցուպատասխանի ժամանակ ՀԱԿ խմբակցության ղեկավար Լևոն Զուրաբյանը հարց ուղղեց կառավարությանը: Նրա խոսքով՝ Սերժ Սարգսյանի փեսան՝ Միքայել Մինասյանը, մենաշնորհել է մեդիա ոլորտը և գովազդի բաշխման բացառիկ իրավունքները: «Ի՞նչ է անում կաավարությունը անընդունելի այս մենաշնորհը վերացնելու նպատակով»,- հարցրեց Լևոն Զուրաբյանը:

Հարցին փորձեց պատասխանել ՀՀ արդարադատության նախարար Հրայր Թովմասյանը` ասելով, որ հարցը լսելուց հետո իր մոտ տպավորություն է, որ ոչ թե չորեքշաբթի է, այլ հինգշաբթի: «Քաղաքական հայտարարություն կարող էիք երեկ անել կամ ասուլիս հրավիրել: Երբ որ ինչ-որ անուններ եք տալիս, ի՞նչ եք ուզում դրանով ասել, որ այնքան ուժեղ եք, որ կարող եք նման անուններ տա՞լ»,- ասաց Հրայր Թովմասյանը:

Լևոն Զուրաբյանն արձագանքեց. «Ինձ մոտ էլ տպավորություն է, որ երբ կառավարությունը պատասխան չի ունենում կամ փաստարկներ չի ունենում, ամբիոնի մոտ է ուղարկում Հրայր Թովմասյանին»: