ԳԲԼՏ ակտիվիստները բողոք են ներկայացրել ''Հայազնի'' անդամների դեմ

ԳԲԼՏ ակտիվիստները բողոք են ներկայացրել «Հայազն» կուսակցության վարչության անդամների դեմ դեկտեմբերի 2-ին Ամիրյան փողոցում Մաքսային միության դեմ երթի ժամանակ իրենց ծեծի ենթարկելու վերաբերյալ: Այս մասին լրագրողների հետ հանդիպման ժամանակ հայտնեց կուսակցության վարչության անդամ Արմեն Աղասյանը:

Նրա խոսքով ` դեկտեմբերի 2-ին, ըստ էության, միջադեպ չի եղել, պարզապես այդ ակտիվիստները խախտել են կազմակերպական որոշակի պայմանավորվածություններ, այդ թվում` այն, որ նրանք այդ օրը չպետք է իրենց ծիածանագույն դրոշներով միանային երթին: Ըստ Աղասյանի` երթի մասնակիցների մեծ մասը չէր ցանկանա քայլել այդ դրոշի ներքո, և նրանց հորդորել են` իջեցնել դրոշը, սակայն նրանք հրաժարվել են և դիմել պրովոկացիայի:

Աղասյանի կարծիքով` բողոքը պայմանավորված է ԳԲԼՏ ակտիվիստների` իրենց հանդեպ տածած թշնամանքով, որը երկար պատմություն ունի: «Նրանք Եվրամիությանն ուղղված իրենց բոլոր զեկույցներում անխտիր նշում են «Հայազնի» անունը, մեզ բնութագրում որպես ֆաշիստների»,- ասաց նա և հավելեց, որ այդ ակտիվիստների մասնակցությունը երթին հնարավոր է` դեսպանատների կամ նրանց գրանտատուների հետ նախօրոք պայմանավորվածության արդյունք լինի:

Աղասյանի խոսքով` իբր տուժողները մի քանի անգամ արդեն փոխել են իրենց ցուցմունքները.  սկզբում նշել էին, որ իրենց ակտիվիստներից մեկի ակնոցը ոստիկանն է կոտրել, հետո փոխել էին ցուցմունքը` նշելով, որ դա եղել է Արմեն Մկրտչյանը, սակայն առերսման ժամանակ ասել են, որ այլ Արմեն է եղել:

Հիշեցնենք, որ դեկտեմբերի 2-ին ԳԲԼՏ ակտիվիստների մասնակցությամբ մեկ այլ միջադեպ էլ ֆիքսել էր yerkir.am-ի տեսախցիկը:
Հրապարակված տեսանյութը` ստորև: