Արամ Աթեշյանը բողոք է ներկայացրել կեղծ կրոնափոխություն կազմակերպած հաղորդավարի դեմ

Պոլսո Հայոց պատրիարքի փոխանորդ Արամ արքեպիսկոպոս Աթեշյանն իր բողոքն է հայտնել օրերս հայ երեխայի կեղծ դավանափոխության վերաբերյալ հաղորդման հաղորդավար Նիհաթ Հաթիփօղլուի դեմ: Նա զանգահարել է Թուրքիայի Կրոնական գործերի նախարարին և իր մտահոգությունը հայտել դեպքի առնչությամբ:

Իր հերթին, Թուրքիայի Մարդու իրավունքների պաշտպանի գրասենյակի փոխնախագահ Էրեն Քեսքինն իր թվիթերյան էջում հայտարարել է, որ Թուրքիայի ՄԻՊ-ի Ռասիզմի և խտրականության դեմ պայքարի հանձնաժողովը դատական հայց է ներկայացնելու այդ դեպքի վերաբերյալ. հաղորդում է t24.com.tr կայքը:

Հաթիփօղլուի քննադատությամբ է հանդես եկել նույնիսկ Թուրքիայի իշխող «Արդարություն և զարգացում» կուսակցության` Ստամբուլից պատգամավոր Մուսթաֆա Եներօղլուն, որը նշել է, որ անընդունելի է առանց ծնողների համաձայնության նման բան անել և դա չի սազում կրոնական քարոզչին: