Ինադ անենք էլերին, երկիրը տանք գելերի՞ն

Այո, այսօր մի շարք ազատամարտիկներ կան, որոնք հիասթափված են, նեղացած, բայց եթե երկրի անվտանգության հարցն առաջ քաշվի, բոլորն էլ պատրաստ են կռիվ տալ. լրագրողներին վստահեցրեց «Արաբո» ջոկատի հրամանատար Մանվել Եղիազարյանը:

Նա ճանաչում է ազատամարտիկների 70-80 տոկոսին եւ հավաստիացնում, որ նրանք, անկախ ամեն ինչից, կրկին առաջինը ճակատ մեկնողներից են լինելու:

«Բա ի՞նչ անենք` ինադ անենք էլերին, երկիրը տանք գելերի՞ն: Եղբայրնե'ր, այսօր դրա ժամանակը չի, որովհետեւ եթե մենք Արցախը տանք, Հայաստանը կդատարկվի: Եվ հետո` ազատամարտիկն իրավունք չունի միայն իր մասին մտածելու, եթե ժողովրդի վիճակը ծանր է, նրա վիճակն էլ պետք է վատ լինի»,- ասաց Եղիազարյանը` հավելելով, որ բանակը պետք չէ կապել երկրի ներքաղաքական իրավիճակի հետ, քանի որ բանակը յուրաքանչյուրիս ընտանիքի, կնոջ եւ երեխաների անվտանգության հարցն է լուծում: