Սկանդալ. ահաբեկչական ''Գորշ գայլեր''-ի խորհրդանիշով թուրքը` Երևանում

Թուրք ազգայնամոլ Հասան Օքթայը ֆեյսբուքյան իր էջում լուսանկարներ է տեղադրել Հայաստան այցից: Նա Երևանում լուսանկարվել է, թուրքական ահաբեկչական «Գորշ գայլեր» կազմակերպության խորհրդանիշը ցուցադրելով, և տեղադրել այն ֆեյսբուքյան իր էջում: Թուրք ազգայնամոլի ֆեյսբուքյան էջից պարզ է դառնում, որ նա Երեւան է ժամանել հունվարի 20-ին:

Մեկնաբանությունների բաժնում ադրբեջանցիները թուրք բարեկամին «զգուշացնում են»` քանի որ նրա այցը համընկնում է Բաքվի ջարդերի հետ, նրան Երեւանում վտանգ է սպառնում: Այնուհետեւ Օքթայը տեղադրել է առաջին լուսանկարը` Հանրապետության հրապարակից` ընկերոջ հետ, երկուսն էլ «Գորշ գայլեր»-ի խորհրդանիշն են ցուցադրում:

Ներկայացնում ենք թուրքերի եւ ադրբեջանցիների մեկնաբանությունները, որոնք արվել են լուսանկարի տակ. «Այո, մեր սիմվոլիկայով Երեւանում ենք», «Մեր պատմական հողը»: Հակահայ մեկնաբանությունների վերջը տալիս են հայերը` գրոհի անցնելով իրենց գրառումներով:

Թուրք ազգայնամոլի հաջորդ ջերմ լուսանկարը, որքան էլ զարմանալի է, թուրքագետ Հակոբ Չաքրյանի հետ է: Պարզվում է`

նա Չաքրյանի հետ Էջմիածնում է եղել:

 Հասան Օքթայը լուսանկար է տեղադրել նաեւ Ռիչարդ Կիրակոսյանի հետ`  գրելով. «Կարճ, բայց հստակ զրույց ենք ունեցել Հայաստան-Թուրքիա  հարաբերությունների մասին»:

Օքթայը տեղադրել է նաեւ «Անկախ» կայքի  հետ ունեցած հարցազրույցը` գրելով. «Շարունակում ենք տեղ գտել  երեւանյան մամուլում», ապա տեղադրել է լուսանկարներ կայքի  աշխատակիցների հետ:

Թուրք ազգայնամոլի գրառումներից պարզվում է, որ կայքի աշխատողների հետ զրույցում տեղեկություններ է հավաքել Հայաստանի մամուլի մասին եւ վստահ է, որ շուտով Երեւանում կբացվի «Անադոլու» գործակալության գրասենյակ, «քանի որ Հայաստանում այն արդեն լայն ճանաչում է ձեռք բերել»:

Ըստ Օքթայի գրառումների` ինքը Հայաստանում է եղել երկու օր, այցից բավարարված է, եւ այն, ինֆորմացիոն առումով, շատ օգտակար էր:

Տեսանյութը, որ ներկայացնում ենք ստորեւ, թուրք ազգայնամոլի հարցազրույցներից մեկն է, որում նա խտրական հայտարարություններ է անում հայերի, հույների և հրեաների մասին:

Yerkir.am

P.S. Հետաքրքիր է, թե ինչ բացատրություն են տալու ազգայնամոլի այցի մասին ՀՀ համապատասխան մարմինները, հատկապես` ԱԱԾ-ն: