Դիսերտանտ Գալուստը, ՀՀԿ-ի տոլման եւ ՀՀԿ-ի ջահելության գյուտը

Քաղաքական կատականի

Դիսերտանտ Գալուստը

Ըստ լուրերի` Գալուստ Սահակյանը ևս բռնվել է ՀՀԿ-ն ճարակած գիտ-ախտով` ատենախոսություն է պաշտպանում: Բնականաբար` բանասիրության գծով, անտարակույս` ժողովրդական բանահյուսությունից: Թեման է` «Հայհոյանքի ժանրի մերօրյա վերընձյուղումը Ազգային ժողովում»: Ասում են` գիտական ղեկավարը Մանվել Բադեյանն է, պաշտոնական ընդդիմախոսը` Շմայսը, առաջատար կազմակերպությունը` Հանրապետական կուսակցությունը:

Ներքո

ՀՀ կառավարությունը օրենքի նախագիծ է ներկայացրել Ազգային ժողով, ըստ որի` այսուհետ բարձր պաշտոնների կարող են հավակնել միայն նրանք, ովքեր կոթը ձեռքին երբևէ հայտնվել են ՀՀ նախագահի բարձր ամպհովանու ներքո:

Հայ քաղաքական բառարան

Գրասենյակ - ժամանակակից ավերիչ զենք, գյուտի հեղինակը ՀՀԿ-ի ջահելությունն է: Ստեղծվել է մեթան գազով հրապարակային պայթյունների փորձի վրա:

Ֆեյսբուք – մարտի գնացող ՀՀԿ-ականների անդավաճան բլինդաժը:

ՀՀԿ-ի տոլման

Ասում են՝ ԱԺ պատգամավոր Առաքել Մովսիսյանը դիմել է դատարան՝ լրատվամիջոցների կողմից արժանապատվությանը հասցված վնասի հատուցման հայցով: Ըստ պատգամավորի՝ իր «փաթթած ունենամ» արտահայտությունը լրատվամիջոցները հանիրավի դարձրին մատի փաթ/ա/թան, մինչդեռ ինքը, Ամանորի հուշերի տակ ընկած, ընդամենը նկատի էր ունեցել ամանորյա տոլման: Ինչ վերաբերում է ՀՀԿ-ին, դրա տոլման իրավամբ անզուգական է, երբ «փաթթած» է լինում:

Լ. Սարգսյան