Սոցիալական ցանցն այս դարի գյուտը չէ

Արաբական աշխարհից թերեւս ամենաքիչն էր սպասելի, որ տեխնիկական զարգացվածությունը խթան լինել հեղաշրջման համար: Սակայն հեղաշրջումն արդեն իրողություն է, եւ ներկայումս տարբեր պետություններում փորձում են կանխատեսել, թե սոցիալական ցանցերն ի՞նչ ազդեցություն կունենան քաղաքական, սոցիալական իրավիճակի վրա, եթե նման խնդիր առաջ գա հենց իրենց երկրում:

Այսօր լրագրողների հետ հանդիպման ժամանակ ԵՊՀ կիրառական սոցիոլոգիայի ամբիոնի վարիչ, քաղաքական գիտությունների դոկտոր Արթուր Աթանեսյանն ասաց, որ ներկայումս սոցիալական ցանց ասվածն ուղղակիորեն ասոցացվում է ինտերնետի հետ, սակայն դա այդպես չէ:

Բանն այն է, որ սոցիալական ցանցը մարդկանց փոխադարձ հաղորդակցությունների համակարգն է, եւ անկախ տեղեկատվական տեխնոլոգիաների զարգացման մակարդակից` մարդիկ միշտ հաղորդակցվել են իրար հետ` ուղղակի կամ երկրորդական կապերի միջոցով:

«Ինտերնետ սոցիալական ցանցերը ուղղակի կրկնօրինակում են իրական սոցիալական ցանցերը: Դուք գիտեք, որ «Ֆեյսբուքում» գրանցված մարդկանց մեծ մասն իրենց կապերով պարզապես տեղափոխվել է ինտերնետ: Այդ կապերը եղել են իրականության մեջ»,- ասաց Ա. Աթանեսյանը:

Այստեղից հետեւություն` միանշանակ չի կարելի ասել, որ ինտերնետային սոցիալական ցանցերն են հեղաշրջում անում. «Եթե մարդիկ պատրաստ են հեղաշրջելու իրենց երկրի քաղաքական կարգը, ապա, անկախ տեղեկատվական միջոցներից, իրենք դա կանեն:  Հիշենք 1917 թվականի սոցիալիստական հեղափոխությունը` ինտերնետ չի եղել, բջջային հեռախոս չի եղել, բայց սոցիալական ցանցեր եղել են»:

Ըստ բանախոսի` պետք չէ գերագնահատել ինտերնետի դերը, այն պարզապես մարդկանց ավելի արագ համախմբելու միջոց է: Օրինակ` եթե նախկինում թռուցիկներ էին տարածում, ապա այսօր հնարավոր է ընդամենը մի քանի րոպեում հարյուրավոր մարդկանց նույն հաղորդագրությունն ուղարկել: