Կիպրոսի իրավասու մարմինները չեն ուղարկել օֆշորային փաստաթղթերի բնօրինակները

Yerkir.am-ը շարունակում է հետևել այս տարվա ամենաաղմկահարույց պատմություններից մեկի` վարչապետի անվան հետ կապված օֆշորային սկանդալի շուրջ ծավալվող զարգացումներին: Տարեվերջյան ամփոփումներին ընդառաջ` փորձեցինք ոստիկանությունից ճշտել, թե ի՞նչ ընթացքի մեջ է ՀՀ վարչապետ Տիգրան Սարգսյանի և Արարատյան հայրապետական թեմի առաջնորդ Նավասարդ Կճոյանի՝ օֆշորային մեքենայությունների գործով նախաքննությունը:

Ի պատասխան մեր հարցմանը` ոստիկանության հասարակության հետ կապերի և լրատվության բաժնից պատասխանեցին, որ այս գործով նախաքննությունը դեռևս շարունակվում է: Մեզ հայտնեցին, որ փաստաթղթերի բնօրինակները ստանալու նպատակով Կիպրոսի Հանրապետության իրավասու մարմիններին ուղարկված` իրավական օգնություն ցուցաբերելու մասին միջնորդության պատասխանը դեռևս չի ստացվել:

Նշենք, որ ավելի վաղ փորձագիտական կենտրոնը միջնորդություն էր ներկայացրել` փորձաքննությանն առաջարկված հարցերին պատասխանելու համար տրամադրել փաստաթղթերի բնօրինակները։ Նախաքննական մարմինը՝ ոստիկանության քննչական գլխավոր վարչության ՀԿԳ վարչությունը, գլխավոր դատախազության միջոցով իրավական միջնորդություն էր ներկայացրել Կիպրոսի իրավասու մարմիններին՝ պահանջվող փաստաթղթերի բնօրինակներն առգրավելու և նախաքննությանը տրամադրելու խնդրանքով:

Փաստորեն, առայժմ անհայտ է` վարչապետ Տիգրան Սարգսյանի և արքեպիսկոպոս Կճոյանի՝ փորձաքննության ուղարկված ստորագրությունները համընկե՞լ են օֆշորային փաստաթղթերի տակ դրված ստորագրությունների հետ, թե՞ ոչ: