Ի՞նչ պատմաճարտարապետական տեսք. Ռուբեն Հայրապետյանը` Փակ շուկայի մասին

ԱԺ նախկին պատգամավոր, ՀՖՖ նախագահ Ռուբեն Հայրապետյանը վստահ է, որ եթե Փակ շուկան ձեւափոխած լիներ մեկ այլ կուսակցության` ԲՀԿ-ից կամ, օրինակ, ՀԱԿ-ից ինչ-որ մեկը, «հաստատ որեւէ մեկը ձեն չէր հանի»:

Հայրապետյանը վստահեցնում է` Սամվել Ալեքսանյանը շատ սիրով է կառուցել շուկան, շատ գեղեցիկ է ստացվել: «Ի՞նչ է ուզածները (խմբ.-ակտիվիստներին նկատի ունի), մի երկու կոպեկ գրանտի համար ինչքա՞ն կարելի ա ատել էս երկիրը: Գեղեցիկ, քաղաքակիրթ առեւտրի կենտրոն է սարքել: Սամվել Ալեքսանյանը մի հատ լավ պաստառ էր կպցրել` շպիոնները»,- նշեց նա:

Հայրապետյանը նաեւ ասաց, որ հիանում է այդ շուկայով, ուրախանում է, որ Ալեքսանյանի պես մարդ կա:

Լրագրողների դիտարկմանը, որ շենքի պատմաճարտարապետական տեսքն է աղճատվել, Հայրապետյանը արձագանքեց.  «Ի՞նչ պատմաճարտարապետական տեսք: Էդ որ Աբովյան փողոցում 20 հարկանի շենք էին կառուցում, ոչ մեկդ ձեն չհանեցիք, որ Աբովյան փողոցը փչացրեցին: Շուկան թարմացվել, սիրունացվել է, ի՞նչ կար պատմաճարտաապետական, որ քանդել են: Ես լինեի` 25 հարկ կկառուցեի: Մի երկու մարդ որոշել են, որ դա պատմաճարտարապետական կառույց է»: